Arfattassiisarneq isumaqatigiinngissutaajunnaalerunarpoq

 Tamanna isumaqarpoq Naalagaaffeqatigiit ataatsimiititaliarsuarmiit aniniarlutik sioorasaarisimanertik tunuartissimagaat. Tamanna atuarneqarsinnaavoq qallunaat nunanut allanut ministereqarfiata IWC-mut allagaani. Ukioq manna naatinnagu aaqqiisoqarsimanngippat, Danmark aniniarluni sioorasaarisimavoq.

Kunngeqarfiup sinniisaata Gitte Hundalip IWC-mut allakkamini oqaatigaa naatsorsuutigigini 2014-ip ingerlanerani Kalaallit Nunaannut Danmarkimullu naammaginartumik aaqqiisoqarnissaa naatsorsuutigigini.

Isumaqatigiinnginneq aallartippoq 2012-imi aasaangaa. Taamani nunatta arfattassat amerlanerunissaat siunnersuutigimmagu IWC ukiumoortumik ataatsimiinnermini itigartitsimmat. Arfattassat amerlineqarnissaat IWC-ip nammineq ilisimatusarnermut komitéata inassutaanut assortuutinngikkaluarput.
Arfattassinneqannginneq  inerneqarpoq taamani Naalakkersuisuusut IWC avaqqullugu nunarput qulinik amerlanernik arfattassimmassuk.

IWC aaqqiissuteqanngiinnarmat taamani nunanut allanut ministerip Villy Søvndalip Naalagaaffeqatigiit IWC-miit aninissaat sioorasaarutigaa. Kingornali attaveqatigiinneq pitsaanerulerpoq. Septemberimilu ataatsimiinnermi IWC-p siulittaasoqarfia aaqqiissutisseerusulerpoq. Ilanngullugu IWC'p nalunaarutigaa aaqqiissutissiinissani kissaatigalugu, ilisimatusarnermullu komité tusaarniarumaniarlugu.

Tamakku tunngavigalugit Gitte Hundahl allakkamini inerniliivoq, killigeqqusap iluani aaqqiisoqarnissaa IWC-ip isumagiumaaraa.