Kalaallit Savalimmiomiullut arfattassaat pillugit, EU oqartussaarusuppoq. Ritzau taama allappoq.
Avatangiisit pillugit EU-mi ministerit marlunngornermi ataatsimiilerpata, EU-mi avatangiisit pillugit kommissærip Stavros Dimas-i saqqummiussaqarniarpoq. Siunertaavoq, IWC Alaskami majip qaammataani ataatsimeersualerpat arfanniartarnissaq pillugu aqutsilernissaq.
- Arfanniarneq pillugu ataatsimiisitaliarsuup IWC-p ataatsimeersuannginnerani, kommission-ip piginnaatitaanissani anguniarlugu saqqummiussaqarniarpoq. Danmarki minillugu, EU-mi nunat ilaasortat EU kommissionimut tamarluinnarmik isumaqataapput.
IWC-mi isumaqatigiinnginneq pissutaalluni, ataatsimiisitaliarsuaq isariaannaavoq. Maannakkorpiaq nunat 72-it ilaasortaapput.
Tikaagulliit nungutaanissamut ilimanaateqanngitsut piniarneqartarsinnaanerat Danmark-ip akueraa.
IWC pillugu pingasunngorpat Aalisarnermut piniarnermullu pisortaqarfimmi ataatsimiittoqassaaq.
