Arfattassat pillugit Danmark nassuiaassaaq

Arfanniarneq pillugu ataatsimiititaliarsuarmi, IWC-mi, ilaasortat ukiumoortumik ataatsimeersuarnerat sapaatip akunnerani tullermi aallartippat, illersuisut akerliusullu Caribiap qeqertaanni St. Kittsimi Nevisimilu naapissapput. Danmarkimi nunanut allanut ministerip, Per Stig Møllerip, Folketingip avatangiisinut pilersaarusiornermullu ataatsimiititaliaani ilaasortat, ataatsimeersuarneq ullunik marlunnik sioqqullugu ataatsimeeqatigissavai.

Danmarkip ataatsimeersuarnermi oqariartuutissaanik nunanut allanut ministerip nassuiaanissaa, SF-ip ataatsimiititaliami ilaasortaatitaanit, Steen Gademit, noqqaassutigineqarpoq.

Nassuiaanerup saniatigut, arfanniarneq pillugu ataatsimiititaliarsuarmi nunat ilaasortaatitallit, arfernik eqqissisimatitserusuttunut Danmarkip qaninnerunera ministerimit nassuiaqquneqarpoq.

Aningaasarsiutigalugu arfanniartaleqqinnissap

taasissutigineqarnerani, Danmarkimi peqataasut akerliullutik taasinissaat ilumoornersoq, Per Stig Møllerimit nassuiaatigineqassaaq. Manerassuup kujasinnerusortaani arferit eqqissisimatitaanissaannut Danmarkimi peqataatitat tapersersuinersut aamma uppernarsassavaa.

Nunatsinni Savalimmiunilu arfattassat pillugit oqariartuutissat, Danmarkimi ilaasortaatitap ataatsimiititaliarsuarmi saqqummiussassai, taama ataatsimeeqatiginnermi allannguiffigineqassanersut apeqqutaalerpoq. Namminersorneq pillugu isumalioqatigiissitat ukiumoortumik ataatsimiinnerat Narsami marlunngorpamiit aallartittussaammat, Kalaallit Nunaat sinnerlugu ilaasortaatitat ataatsimiinnermi peqataassanngillat. Folketingimili ilaasortaq, Kuupik Kleist, oqarpoq, Danmarkimi nunanut allanut ministeri siusinnerusukkut ataatsimeeqatigamiuk neriorsuisimasoq, oqariartuutissat allannguiffiginiarnagit. Allannguisoqassagaluarpat nunatsinni naalakkersuisut apereqqaarneqartussaassapput.