Arfanniat qilalugartartik neqqarinnersaatigut ikilerujussuarsimammassuk neqaata ilarujussua nerineqarsinnaanngitsoq, peqatigiiffiit allapput.

Arfanniat qilalugartatik mattaajaannariarlugit qimaannarsimagaat

Aalisarnermut, Piniarnermut Nunalerinermullu Naalakkersuisoqarfiup qilalugarniarnermut malittarisassat arfannianut eqqaasitsissutigaat. Maniitsumilu aalisartut piniartullu peqatigiiffii pisut aamma ajuusaarnartippaat.

- Sisimiut Maniitsullu eqqaanni qaqortarniarneq unioqqutitsinerullunilu pissuserissaarnerunngilaq.

Aalisarnermut, Piniarnermut Nunalerinermullu Naalakkersuisoqarfik tusagassiuutinut nalunaarummini taama allappoq.

Qaqortanimmi qilalugarniarnerni marlunni qilalugartat mattaajaannariarlugit pilaffimmi qimaannarneqarsimasut, naalakkersuisoqarfik ilisimatinneqarpoq.

Taamaammat qaqortanik qernertanillu qilalugarniarnermut malittarisassat malinneqartarnissaat, naalakkersuisoqarfiup piumasaraa. Naalakkersuisoqarfiup taama piumasaqarnini iluatsillugu qilaluarniarnermut malittarisassat eqqaasitsissutigai.

Qilalugartap nerisassartai atorneqarsinnaasuilu allat tamarmik angerlaanneqarlutilluunnit qimatulineqassasut, tassa perlukut nassarlugit eqqarneqarlutilluunniit toqqorneqassasut eqqaasitsissutaani allaqqavoq.

KNR-ip arfanniat mianersoqqussummik tuninineqarsimanersut Aalisarnermut, Piniarnermut Nunalerinermullu Naalakkersuisoqarfik ataasinngornermi oqaaseqartinniaraluarpaa, iluatsinnaguli. 

Maniitsumi peqatigiiffik: Atorluaanerusariaqarpugut

Maniitsumi aalisartut piniartullu peqatigiiffii, MAPP aamma MUAPP, aamma qisuariarput. 

Arfanniat qilalugartartik neqqarinnersaatigut ikilerujussuarsimammassuk neqaata ilarujussua nerineqarsinnaanngitsoq, peqatigiiffiit allapput.

- Peqatigiiffinniit erseqqissaatigissavarput mattaajaaginnarsimaneq ajuusaarnartutut isigigatsigu akuerinagulu, Maniitsumi peqatigiiffiit tusagassiuutinut nalunaarumminni allapput.

Nunatsinni pisanik assigiinngitsunik atorluaanerusariaqartugut, Maniitsumi peqatigiiffiit isumaqarput - qilalugartallu qaqortat kisimik uani pineqanngillat. Pisanimmi allanik aamma atorluaasoqartanngilaq.

Peqatigiiffiup puisitat assersuutigai.

- Maniitsoq qiviarutsigu ajuusaarnartumik oqaatigissavarput puisittarpassuit neqaat maanngaannaq eqqarneqartarmata. Tamanna patsiseqarpoq, puisit amii tunisaammata puiserpassuit pisarineqartarput, uggornaraluartumillu neqaat tunitsivissaarunnikuummata inuillu pisiarisinnaasaat killeqaqimmata, allatut ajornartumik igiinnarneqartarput, Maniitsumi peqatigiiffiit allapput.

Isummersuutit



Nutaarsiassaateqarpit?

Nutaarsiassaateqarpit?

1717-imut SMS-erit, UNNIA allariarlugu kingornalu oqaluttuat allallugu.

Immersuivik atorlugu allaffigitigut knr.gl/1717

Emailikkulluunniit 1717@knr.gl

KNR TV: TekstTV-mi paasissutissat

TTV q 110 Ullut tamaasa nutaarsiassat

TTV q 400 Timmisartuutinissat
aallartussat tikitussallu

TTV q 300 Tv-kkut aallakaatitassat
tulleriiarnerat

TTV q 300 radiukkut allakaatitassat
tulleriiarnerat