Arfanniartitsisalernissamik suliniut akerlerineqarpoq
Nunat tamalaat arfanniarneq pillugu ataatsimiititaliarsuanni IWC-mi danskit siulittaasutut angunigaat uumasunik illersuiniaqatigiiffimmit akerlilersorneqalerput.
Iluanaarutigalugu arfanniartarnerup 1986-imi unitsinneqartup, piujuartitsinissaq tunngavigalugu killilersugaasumik arfanniartarnermik taarserneqarluni ingerlanneqaqqilernissaa Danmarkip, Arfanniartarneq Pillugu Ataatsimiititaliarsuarmi siulittaasuutitaqartup sulissutiginiarpaa. Tamannali uumasunik illersuiniaqatigiiffimmit Dyrenes Beskyttelse-mit akerlerineqarpoq.
-Aningaasarsiutigalugu arfanniartarneq nunarsuarmi miluumasut anginersaannik naalliutsitsinerussaaq, Ole Münster, Dyrenes Beskyttelsep siulittaasua, IWC-ip suleqatigiissitaata Københavnemi ulluni makkunani ataatsimiinneranut atatillugu tusagassiuutini taama oqaaseqarpoq.
Arfanniartarneq Pillugu Ataatsimiititaliaq 1946-imi pilersinneqartoq, danskenit nunarput Savalimmiullu sinnerlugit ilaasortaaffigineqarpoq. Ataatsimiititaliami ingerlatsinikkut 1992-imili allanngortiterisoqarnerata kingorna, arfanniartarnermik killilersuiniarneq ajornartorsiutaalerpoq. Nunat suliniaqatigiiffiillu arlallit ataatsimiititaliarsuarmi ilaasortaatitaqartut arfanniartarnermik unitsitsiniarlutik suliniutaat iluatsilluarsimagaluartut, kalaallit nunap inuiisut inissisimasut namminneq atugassaminnik immikkut suli arfattassinneqartarput.
Nunarput tikaagullinnik 187-inik tikaagulliusaanillu 15-inik ukiut tallimakkaarlugit pisassiinermi kingullermi pisassinneqarpoq, pisassiinissarlu tulleq 2007-imi suliarineqassaaq. Tikaagulliit nunarsuaq tamakkerlugu millionenik amerlassuseqartut nungutaanissamut ulorianartorsiortitaanngitsut, nunanut allanut ministeriaqarfimmit Henrik Fischer, IWC-mi aamma siulittaasuusoq oqarpoq. Dansket piujuartitsinissaq tunngavigalugu arfanniartalernissamik sulissuteqarnerannut nunarput tapersersuisoq, Piniarnermut Pisortaqarfimmi allaffiup pisortaa Ole Heinrich oqarpoq.
Piujuartitsinissamik tunngaveqarluni arfanniartarnissamik suliniut piviusunngortinneqanngippat, tamanna ataatsimiititaliamut kinguneqarnerlussinnaasoq Ole Heinrich oqarpoq, oqarporlu Dyrenes Beskyttelsep taama maanna isornartorsiuinera nutaarsiassaanngitsoq.
IWC tullianik ataatsimiissaaq juunimi, ataatsimiinnerlu Koreami kujallermi pissaaq.
