Arfanniartarnitsinnut danskit isummertarnerat illuatungilerneqarpoq
Nunat tamalaat arfanniarnermut kattuffissuanni Danmarkip kalaallit soqutigisaanik illersuinera Danskit uumasunik illersuiniaqatigiiffiani “Dyrenes beskyttelsemi” pisortap Ole Münster-ip aamma uumasut nakorsaata Bjarne Clausen-ip sakkortuumik illuatungilerpaat:
Dyrenes beskyttelsemeersut Ole Münster aamma Bjarne Clausen aviisimi Informationimi ullumi tikkuaapput oqarlutik; Great Greenland-ip Canadamiut puisittaasa amiinik pisiniartarnermigut nunat inuiisa piniariaasiannik ataqqinninneq aserorsimagaa.
- Kissaatiginartipparput arfanniartarneq pillugu Danmark Kalaallit sunniiniartarnerattut kimittutigisumik puisit arferillu annaanneqarsinnaanerat pillugu isummissasoq, taamaaliornikkut danskit kissaatigisaattut arfanniartarneq pillugu politikkeqartoqalissagaluarmat Ole Münster aamma Bjarne Clausen oqarput.
Nunarput sinnerlugu Folketingimi ilaasortaasut sakkortuumik avoqqaarleraat Uumasunik illersuiniaqatigiiffiup ataatsimeeqatiserinnittarnerinut akineq ajormata.
-Akuersaarneqarsinnaanngilaq Folketingimi ilaasortaq Kuupik Kleist, danskit aviisianni Informationimi puisinniartarnermik illersuilluni oqaaseqarmat, Danmarkimilu uumasut pitsaanngitsumik atugaqartitaanerat takornartaannginnerarlugu.
Ole Münster-ip Bjarne Clausen-illu Canadamiut puisinniariaasiat aamma sakkortuumik avoqqaaraat.
- New Foundland-imi ukiut tamaasa puisit 300.000-it pisarineqartarput, taakkunannga ikinnerpaamik puiseeqqat 24.000-it uumatillutik pilanneqartarput. Taamaammat paasiuminaalluinnarpoq nunat innuttakitsut arfanniarnermik inuuniutillit tusaamaneqarnerannut innarliutaasumik Kalaallit Nunaata tungaanit Canadamiut puisinniartarnerannut illersuisutut inissisimasoqarmat, Ole Münster Bjarne Clausenilu Aviisimi Informationimi taama uparuaapput.
