Arfanniartarnermi sakkugineqartartut isornartorsiorneqarput

Kalaallit Nunaanni arfanniartarnerni sakkugineqartartut ukioq manna IWC-p ataatsimeersuarnerani aamma eqqartorneqaqqipput. Kalaallit Nunaanni arfanniartartut aallaasersorlutik arfanniartarnerat uparuartorneqartunut ilaasoq, Aalisarnermut piniarnermullu pisortaqarfimmi pisortaq Amalie Jessen oqarpoq.

Nunanit assigiinngitsuninngaanniit, pingaartumik Australiamiit, NewZealand-mit Sverigemiillu, nunarput assut ajornartorsiortinneqarpoq, allaat ilaat nilliasarlutik oqalugiarput. Kissaatigineqarpoq qoorortoorsuaq sakkortooq nagguaatsorniummik taaneqartartoq arfanniutigalugu minnerpaatut piumasaqaataassasoq, tassa 9,3-mik sulloqqortussusilik. Maannakkut Kalaallit Nunaanni minnerpaaffigitinneqarpoq 7,62millimiiterimik sulloqqortussusilik. Kisianni akisugineqartarpoq, atorneqarnissaalu ilisimaneqarpiarani. Nersorniarneqarpugullu qamutillit pillugit pikkorissartitsisarsimagatta, tamannalu nuannaaarutigaarput, Amalie Jessen oqarpoq.