IWC-p ataatsimeersuarnera suli aallartinngitsoq uumasunik illersuiniaqatigiit Tyskland-meersut ataatsimeersuarfissap Hotel Lotte-p silataani akerliusutsimik takutitsisut arlalissuit takussaapput.
Tyskit meerartaasa arfanniartarnermik akerliunerminnik oqariartuutaat, titartakkat allakkallu assigiinngitsut, pappialarujussuarmut aqqusinermut siaarlugu takusassiarineqarpoq. Allagartani takuneqarsinnaavoq arfanniartarnermik akerliusut.
Akianiipput Japanimiut aamma allagartarsualisaartut, taakkuali arfanniartarnermut akerliunermik takutitsinatik, ilisimatusaartigalugu arfanniartarnermik illersuisuupput.
Tusagassiortut nunarsuarmi assigiinngitsuneersut assiliillutillu akerliusut eqqaanni ussateqaat. Allagartat ilaatigut Hotelip eqqaani nakkutilliisunit piiarneqartarput, ilaalli atatiinnarneqartarlutik.
Ulluni kingullerni qulini, nunat sisamat IWC-mut ilanngussimapput. Nunat ilannguttut tassaapput, Togo, Cambodia, Luxemborg aamma Cameroun.
- Ukiut taakku tamaasa ataatsimiinnerit naalaani pisarmata, aamma inuit isummaminnik anitsinissaminnik kiffaanngissuseqarmata, tamakku tamaasa ataqqivakka, Aalisarnermut Piniarnermullu pisortaqarfimmi pisortaq Amalie Jessen oqarpoq nangillunilu; - Akerliusut qeqqaniittut illersuisullu soqutiginartarput isigalugit, aliikkutaasarput.
