Arfanniarsinnaaneq Danmarkip kisimiilluni EU-mi tapersersorpaa

Kalaallit Savalimmiormiullu arfanniarsinnaanerat Danmarkimit isumaqatigineqarluni tapersersorneqarmat Danmark arfanniartarneq pillugu EU-mi immikkut inissisimalerpoq.
Allattoq Jaaku Lyberth
juunip 08-at 2008 17:07

Arfanniartarnerup unitsinneqarallarnissaanik EUp piumasaqarnera, Danmarkimit tapersersorneqanngilaq.

Kalaallit Savalimmiormiullu killlimmik arfanniarsinnaanerat Danmarkip EU-mi akueritinniaraluarpaa. EU-mili ilaasortat sinneri ingammillu EU-p kommission-iani akuerineqarsinnaanngilaq, nunat allat ingammik Japan affaniarnerup uniatsinneqarallarnissaanik akuerseqataajummanngimmata.

EU-mi aalajangerneq avatangiisinut ministerit Luxemourgimi ataatsimiinneranni pivoq.

Qallunaat arfanniarsinnaanermut piumasaqarnerat EU-mi soqutigineqarani akuersaarneqanngilaq. Tamatuma kingunerilissavaa nunat tamat arfanniarneq pillugu ataatsimiititaliarsua IWC Santiagomi Chilemi qaammatip uumap ingerlanerani ataatsimiilerpat EU-mi aalajangerneq saqummiunneqartussanngorneranik.

Socialdemokratit Socialistisk Folkepartiillu Danmark kajumissaarpaat, imarpissuup kujasinnerusortaani arfeqarfimmik pilersitsinissamik tapersersueqqullugu.

Imarpissuup kujataani arfeqarfeqalernissamik siunnersuut nunat Atlantikup kujasinnerusortaata eqaaniittut siunnersuutiginikuuvaat, siunnersuummullu tassunga Danmark akuerseqataasimanngilaq.

Folketingimi avatangiisit pillugit ataatsimiititalimi siulitaasup Steen Gadep SF-imeersup danskit nunanut allanut ministeriat Per Stig Møller pingasunngorpat ataatsimeeqatiginiarlugu aggersaarpaa, nunat tamat arfanniarneq pillugu ataatsimiititaliarsuaq IWC pillugu.

Steen Gade isumaqarpoq Kalaallit Savalimmiormiullu nammineerlutik arfanniarneq pillugu pisinnaatitaaffitik nunat taamat arfanniarneq pillugu ataatsimiititaliami saqqummiussisinnaasariaqaraat, taamaalilluni Danmark naalagaaffeqatigiinneq pissutigalugu pisussaatitaaffeerunniassammat.

Danskit EU-mi affanniarsinnaanermut isummernerat EU-mi avatangiisinut ministerinit EU kommisionimillu tapersersorneqannginnera Steen Gademit iluarisimaarneqarpoq.

Enhedslisen atlantikup kujataani arfeqarfimmik pilersitsinissamik tapersersuipput, SF-illu kalaallit nunaat savalimmiullu pillugit isummernerat tupassutigalugu. Taakkumi isumaqarput Savalimmiormiut Kalaallillu soqutigisaat naalagaaffeqatigiinnerup iluani ingerlanneqartariaqartut, Per Clausen nutaarsiassaqartitsivimmut Ritzaumut oqarpoq.