Arfanniarnermut ataatsimiititaliarsuaq atorunnaarsinnaavoq
Arfanniartarneq pillugu ataatsimiititaliarsuaq ingerlaqqissappat arferillu illersorneqassappata, aningaasarsiutigalugu arfanniartarnerup nakkutigineqartumik eqquteqqinneqarnissaa pisariaqarpoq. Ataatsimiititaliarsuup siunissaa pillugu Japanimi ullut pingasut ataatsimiittoqarnerani tamanna erseqqissarneqarpoq.
Nunat Arfanniartarneq pillugu Ataatsimiititaliarsuarmut ilaasortaasut 72-iusut ilaat amerlanerussuteqaqqalaartut 37-t Tokyomi Japanimiut qaaqqusisoralugit ataatsimeeqqammerput.
Ataatsimeereernermi danskit arfanniartarneq pillugu aallartitaat Ole Samsing nunanut allanut ministereqarfimmeersoq oqarpoq Arfanniartarneq pillugu Ataatsimiititaliarsuup ingerlaannarnissaa mianersortunnguamik isumalluarfigigini. Ukiuni kingullerni ataatsimiititaliarsuarmi suleqatigiinneq ingerlanerliorsimaqaaq. Nunat ilaasortaatitaqartut apeqqutini pingaarutilinni, soorlu arferit ilaasa aningaasarsiutigalugu piniarneqartalernissaat pineqaleraangat avissaartuuttarput. Arfanniartarneq 1986-imili inerteqqutigineqalerpoq. Arfanniarnissamut taamaallaat akuerineqartarlutik ilisimatusaatigalugu arfanniarneq kiisalu inuiaat kulturertik naapertorlugu inuussutissaqarumallutik arfanniartartut, soorlu kalaallit.
Naalagaaffiit ilaat soorlu Rusland, Norge, Japan nunallu ineriartortut aningaasarsiutigalugu arfanniartalerusupput. Illuatungaani naalagaaffiit soorlu Australia, New Zealand nunallu EU-mut ilaasortaasut tamanna akuersaarumanngilluinnarpaat. Taamaattumik nunat arfanniarnermik ingerlatsisarsimasut maanna Ataatsimiititaliarsuarmit aniniarlutik sioorasaarutigaat, namminersorlutillu arfanniarnermik ingerlatsilerusullutik.
Danmarkip aningaasarsiutigalugu arfanniartarneq akerleraa, taamalu 1986-imiit arfanniarnermik inerteqquteqarneq tapersersugaralugu. Kisianni siorna nunatsinnit Savalimmiunillu kimigiiserfigineqarnermigut Japanip killilimmik aningaasarsiutigalugu arfanniartalernissamik aalajangersagassatut siunnersuutaa akuersaarpaa. Taamaalilluni Danmark akissarsiutigalugu arfanniartalernissamut aalajangersakkamut amerlanerussusiivoq. Kisianni taamatut arfanniartoqartalissappat ilaasortat 3/4-iisa akuersinissaat piumasaqaataavoq.
Ole Samsing ataatsimiinnermik naliliilluni oqarpoq arferit ilaannik nakkutigineqartumik nungusaataanngitsumillu aningaasarsiutigalugu arfanniartalernissaq siunissami saneqqunneqarsinnaanavianngitsoq.
