Arfanniarnermi piginnaatitaaffiit aallannguuteqassanngillat

Arfanniarneq pillugu Ataatsimiititaliarsuup, IWC-p, ukioq manna ataatsimiinnerani danskit isumaqatigiinniarnerni piginnaatitaaffii allannguuteqassanngillat.

Danskit nunanut allanut ministeriat, Per Stig Møller, Folketingimut ilaasortap IA-meersup, Kuupik Kleistip, ippassaq ataatsimeeqatigereerlugu taama oqarpoq.

Kuupik Kleist naapertorlugu Per Stig Møller neriorsuivoq, naalagaaffeqatigiit, Kalaallit Nunaata, Savalimmiut Danmarkillu ataatsimiinnerup aallartinnginnerani malittarisassanut isumaqatigiissutaat ukioq manna allanngortinneqassanngitsoq.

Kalaallit aallartitaat naapertorlugit, apeqqut tamanna pingaaruteqarpoq, tassa danskit tungaanniit siorna tassanngaannaq naalakkiutigineqarmat, Danmark, taamaalillunilumi Kalaallit Nunaat aamma, qanoq taasissasut, Kalaallit Nunaannut ajoqutaasinnaasumik.

Kuupik Kleist aamma oqarpoq, Per Stig Møller neriorsuisoq, malittarisassat ukioq manna allannguuteqartinneqassagaluarpata Naalakkersuisut Danmarkip isumaqatiginiarumaarai.

Arfanniarneq pillugu Ataatsimiititaliarsuup ingerlatsinermut eqqissisimatitsinermullu isumaannut Kalaallit Nunaata isumaqataanera aalajangiusimallugu nunanut allanut ministerimik ataatsimeeqateqarnermini Kuupik Kleistip erseqqissarpaa.