Arfanniarneq pillugu politikki aalajangiusimavaat
Arfanniarneq pillugu ataatsimiititaliarsuup, IWC-p, ataatsimiinnissaanni tulliuttuni tallimani atuuttussamik EU-p arfanniarnermut politikkissaanut EU-mi ministerit oqaasertaliornissamut pisinnaatinneqassasut, oktobarimi siunnersuutigineqarpoq.
Arferit minnerit pillugit IWC-p aqutsisalernissaa, EU-p aamma kissaatigaa. Siunnersuutilli tapersersorneqanngillat, Inuit Ataqatigiillu sinnerlugit Folketingimut ilaasortap Sara Olsvigip tamanna iluarisimaarpaa:
- Arfanniarneq pillugu Naalagaaffeqatigiinnermi siunnerfik, Danmarkimi maanna Naalakkersuisut ingerlateqqikkaat nuannaarutissaavoq, Sara Olsvig oqarpoq, nangillunilu:
- Arfanniarneq pillugu EU-p isumaa assersuutigalugu Kalaallit Nunaanni Savalimmiunilu piviusunut naleqqiullugu oqimaaqatigiissaarinngilaq. Misilittakkallu tunngavigalugit, piujuarnissarlu tunngavigalugu arfanniartarpugut, taamaammat arferit minnerit pillugit nammineq aqutsissaagut, IWC-p ataani inissinnata, Sara Olsvig oqarpoq.