Arfanniarneq pillugu fuldmægtigitoqaq tunualerpoq

Arfanniarneq pillugu ataatsimiititaliarsuaq aappagu pisassanik agguaassilerpat Kalaallit Nunaat ernummatissaqanngilaq.

- Namminersornerullutilli Oqartussat qiporartassinneqarnissamik kissaateqaatertik eqqarsaatigilluartariaqarpaat, danskit nunanut allanut ministereqarfiani fuldmægtigi Arfanniarnerlu pillugu ataatsimiititaliarsuup ukiuni 20-ni kingullerni ataatsimiisitsisarnerani naalagaaffeqatigiinneq sinnerlugu peqataasartuutitaa Henrik Fischer taama oqarpoq.

Henrik Fischer Arfanniarneq pillugu ataatsimiititaliarsuup ataatsimiisitsisarnerini ukiorpaalunni peqatasareerluni maanna utoqqalinersiuteqalernini pissutigalugu tunuarnialerpoq.

1986-imi siullerpaamik ataatsimeeqataavoq, taamanikkut aningaasarsiutigalugu arfanniartarnerup inerteqqutaalernera atuutilerpoq.

Henrik Fischerip sinniisutut peqataasarnissi oqittuinnartut isigisimagaluarlugu paasilersimavaa oqittuinnaanngitsoq:

- Aallarteqqaarama oqittuinnartut isigisimavara, sunaaffali taamaanngitsoq, Henrik Fischer oqarpoq.

Arfanniartartut ukiuni 20-ini kiffartuutereerlugit Henrik Fischer maanna tunuarnialerpoq. Danskerpassuillu arferup neqaata mamassusaa nalugaat taassuma nalunngilluinnarpaa. Nunatsinni arferup neqaa mamarinerpaasani misilissimavaa:

- Arferup neqaa mamarnerpaaq qangarsuanngorpoq misilikkakku. Neqi siataq, naatsiialerlugu, miseqqerlugu naatsitalerlugu Sisimiuni misilippara, Henrik Fischer naggasiivoq.

Henrik Fischerip Arfanniarneq pillugu ataatsimiititaliarsuarmi sinniisutut Ole Samsing paarlatsigissavaa. Ole Samsing danskit nunanut allanut EU pillugu siunnersortitut atorfeqarpoq. Tikaagulliit 175-t tikaagulliusaallu qulit ukiut tamaasa nunatsinnut pisassatut tunniunneqartarput.