Arfanniarneq pillugu aalajangiussaq Socialdemokratimit taperserneqarpoq
Kalaallit Nunaanni Savalimmiunilu nungusaataanngitsumik aalisartoqartarnissaa pillugu danskit naalakkersuisuisa isummiussaat, Folketingimi Socialdemokratit taperseraat, Socialdemokrateqataasup Dan Jørgensenip arfanniarneq pillugu EU-p isummiussaa akerlianik taperserpaa.
- Ajunngilluinnarpoq Dan Jørgenseni Europa-miorpalaartumik isiginneriaaseqarsimassappat, Folketingimi qinikkat ilagaannga danskisullu uanga isiginneriaaseqarpunga, tassalu imaappoq danskit kalaallit savalimmiormiullu naalagaaffeqatigiiusutut isigigikka. Tamanna pillugu assigiinngitsumik isiginneriaaseqarsinnaagaluarluta Dan Jørgensenip isumaa ajorinngilluinnarpara, taama folketing-imi ilaasortaq Mette Gjerskov oqarpoq.
Taanna Inge S. Rasmussenimit aperineqarpoq tamanna Socialdemokratit isumaannik paatsiveerutitsinerussannginnersoq.
- Socialdemokratit qanoq inissisimanertik ilisimaarilluartuuaat. Tamatumunngalu suliamut tunngatillugu danskit naalakkersuisuisa aalajangiussaat tapersersugaraarput.
Pingaaruteqarluinnaqqissaarpormi nungusaataanngitsumik aalisarnerup ingerlanissaa, taamatuttaaq pingaaruteqarluinnarpoq Kalaallit Nunaat Savalimmiullu isumaqatigiissummut tassunga peqataalluinnarnissaat, Mette Gjerskov oqarpoq.
Taanna aperineqarpoq, qanoq igissagaluarneraa amerlanerussuteqartunit piumasarineqaleraluarpat taamatut isummiussisimanerup allanngortinneqartariaqarneranik.
- Danskit naalakkersuisuisa isumartik allanngortissappassuk, taava aamma tamanna malissavarput. Maannakkuugallartorli pisut ima inissisimapput danskit naalakkersuisuisa kalaallit savalimmiormiullu isumaqatigiissuteqarfigisimammatigik, taannalu tassa toraagassarput, Mette Gjerskov oqarpoq.
Taanna qalleqqillugu aperineqarpoq, pingaaruteqartuusoq EU-p aalajangiussaata malinneqarnissaa taamaattumillu eqqumiiginassannginnersoq EU-miit allaanerusumik Danmarki isummerniarsarissappat?
- Aap pingaaruteqartuuvormi EU-mi ilaasortat ataatsimut oqariartuuteqarnissaat, aamma neriuutigaara aaqqiisoqarumaartoq taamaalilluni EU tamanna pillugu ataatsimut oqariartuuteqarsinnaaleqqullugu, Mette Gjerskov akivoq.
Taannali aamma naggataagut erseqqissaavoq inuiaqatigiinnguit mikinerusut naalagaaffeqatigiinnerup aqqani isumagisariaqartut, taamaalillunilu aamma pingaartinneqartariaqartoq nungusaataanngitsumik aalisartoqartarnissaa.