Arfanniarneq ajutoortoq oqallitsitsivoq
Nuup Kangerluani arferit utikattut ilaat qanittumi piniarneqarpoq annaaneqarlunilu. Tamassuma kinguneraa immami arferit aningaasarsiorfigilluarnerunissaannik oqallittoqalernera.
Arfanniat Nuup Kangerluanut utikattut unitsillugit takkuttut nutaat piniarneqartalernissaat takornarialerisuni angallatip naalagaa Erik Palo Jakobsen taama siunnersuuteqarpoq.
- Iliuuseqartoqarsinnaavoq tamatsinnut pitsaasumik kinguneqartussamik, Erik Palo Jakobsen oqarpoq.
Arfeq uumasoq qanoq naleqartigaa?
Arferit arfannianut kisimi aningaasarpassuarnik naleqanngilaq aamma illoqarfiit pingaarnersaani takornariartaatilerisunut isertitsiviulluartarput, Erik Palo Jakobsenip naqissuserpaa nangillunilu oqaatigalugu takornarissat isiginnaassallugu nuannarisaat tassaammata arferit, nunattalu karsianut aningaasarpassuarnik isaatitsiviullutik. Arfanniat takornariartaatillillu arferit aningaasarsiuutiginissaannut ikioqatigiittariaqartut taassuma oqaatigaa, oqallisigineqarnissaalu ujartorlugu.
- Oqallinnermi ujartorusuppakka periarfissat periuutsillu ingerlatseqatigiiffigisinnaasagut tamatsinnut iluaqutaasussanik, Erik Palo Jakobsen oqarpoq.
Qanittumi Erik Palo Jakobsen allallu takornariartaatini naalakkat illoqarfitta eqqaani arfermik annaasaqarput, qipoqqaq "nummer 5", nuup kangerluani arferni takuneqarnerpaasartuni pingajuusoq takornariartaatsip angalaffiata qanittuani qamutilinneqarmat. Arferli arfanniarnerup kingernarujussua sivisuumik ussataareerluni kivisoorutigineqarpoq.
- Aliasuppunga, arferimmi kangerlummut utikattut takornariaqarnermut nunatsinnullu annertuumik pingaaruteqarput, tassami immami ornigarneqartut annersarimmassuk, Erik Palo Jakobsen oqarpoq.
Utikattoq annaaneqarpoq
Pinngortitaleriffimmiit nalilerneqarpoq, nuup kangerluani arferit utikattut arfineq pingasuusut, taakkuuppulli arlalitsigut illoqarfimmiit takuneqarnerpaajusartut. Ukiut marlullu iluanni pingasut pisarineqareerput toquinnarneqarlutilluunniit:
Arfannianit utikattut unitsillugit arferit allat pisarineqartalissasut takornarissanik ingerlatsisoq neriuuteqarpoq. Arfanniaq, Anthon Egede angallatiminit Marie Egedemit Sorimiillu arfanniartarpoq, takornariartaatilerisunit arferit pillugit suleqatiserinninneq qilanaartuutigaa. Taassumap misilittagai tunngavigalugit suleqatigiinneq amigaataasimasoq:
- Piniarniarnerup nalaani, tamakkununnga arfernut pisaqarsinnaanermut attuumassuteqanngilluinnartut akornusersorneqarnerit pinngitsoortinneqarsinnaappata soorunami suleqatigiissinnaanissaq anguneqarsinnaavoq, Anthon Egede oqarpoq.
Arferit allat pisarinissaanut ikiuukkusuppoq
Illuatungaaniipporli takornariartaatsini naalagaq Erik Palo Jakobsen. Taassuma naqissuserusuppaa arfanniarneq akerlerinngilluinnaramiuk. Angalaartilluni arferit allat arfannianit pisarineqartarnissaannik ikiorusuppoq.
- Arfeq utikattuunngippat arfanniat kalerrinnissaat piareersimaffigaara, oqaluttuullugit inissisimaffimmi uani arfeq kusanartoq takusimallugu, Erik Palo jakobsen oqarpoq.
Arfanniat tusarluarput.
- Arlaatigut qanoq iliortoqartariaqarpoq, suleqatiserinninnerallu soorunami atorluarsinnaavarput iluaqutigisinnaagutsigulu qujanartorujussuussaaq, arfanniaq Anthon Egede taama oqarpoq.
Ukiut pingasut qaangiummata Sermersuup Inuussutissarsiornikkut Siunnersuisoqatigiivisa arfanniat takornariartaatillut pinngortitaleriffiullu akornanni arferit pillugit ataatsimiisitsipput. Ataatsimiinnerulli kingorna pinngortitaleriffik arferit kangerlummi ingerlaartut pillugit ilisimasaqarnerulerput, tassa utikattut amerlagisassaanngitsut tassaasut takuneqarnerpaasartut.
Arfeq sorliunersoq paaserusukkaanni nuup kangerluata arferisa paperuisa assingi pinngortitaleriffimmi piniarneqarsinnaapput.
