Arfanniariaaseq assortuussutigaat

Arfanniarneq pillugu ataatsimiititaliarsuup Alaskami Anchoragemi ataatsimeersuarneranut uumasunik illersuiniaqatigiiffiit tamalaat alaatsinaatsitaqarput, tamakkununngalu ilaavoq, uumasunik illersuiniaqatigiiffik WSPA. Taakku aningaasannanniutigalugu arfanniartarnissamut akerliupput illuatungaanilu Japanimiut aningaasannanniutigalugu arfanniartarnissamik piumasaqartut oqarput illersuineq aningaasannanniutaalersimasoq.

-Arferit illersorniarlugit maniippunga.

Sooq? Aperaarput.

- WSPA allatulli isumaqarami aningaasarsiutigalugu arfanniartarneq eqqortuliornerunngitsoq. Arferit kalaallillu aamma soqutigisarinngimmassuk.

-Nalunngilarput puulukit aamma silatuujusut, kisianni ilissi aamma aningaasarsiutigaasi.

- Aap ilumoorpoq akivoq.

- Sunami puulukit arferillu assigiinngissutigigamikku?

Lasse bruun WSPA-meersoq aperaarput, akivorlu:

-Arferit puulukillu tamarmik silatuujupput iluamik pineqartariaqartut, ajornartorsiulli uaniippoq Danmarkimi imaluunniit Kalaallit Nunanni nunarsuarmilumi tamarmi arferit aningaasarsiutigineqarnissaat akerlerigatsigu, naak Danmarkimi aamma puulukit ajornartorsiortitaasaraluartut arferit illersorusukkatsigit.

Japanimiut isumaqatiginninniartuisa ittuat Morisita oqarpoq namminneq ilumoorlutik pinngortitamik uumasuinillu suliniuteqrluartut ataqqilluinnarlugit.

Isumaqarporlu ullumikkut uumasunik pinngortitamillu illersuiniarneq aningaasarsiutaannartut atorneqarpallaalersoq. Japanimiut ullumikkut aningaasarpassuit atorlugit paasisitsiniaasariaqarput allaat, japanimiummi arferit nungusarneqarnissaat soqutigisarinngimmassuk. Tamanna pillugu Lasse Bruun aperaarput:

-Ukiut tamaasapineqartut aningaasarsiutitut ilissi atulinngilisigit?

- Taamaassorinngilarput, isumaqarpugulli pineqartoq isiginnittaatsinik illuatungeriittunik naliliiffigineqartariaqartoq. Inuppassuupput arfernik illersuillutik aningaasarsiutigineqarnissaannut akerliusut, oqimaaqatigiittoqassappallu uagut arferit illersortariaqarpagut, Lasse Bruun WSPA-meersoq oqarpoq.