Arfanniaq IWC-mut
Allattoq Najaaraq Egede
Arfanniartartoq, Leif Fontaine, Aalisarnermut Piniarnermullu naalakkersuisoq, Finn Karlsen, taarserlugu Arfanniarneq pillugu ataatsimiititaliarsuup IWC-p ataatsimiinnerani nunatsinnit peqataassaaq.
Aalisarnermut Piniarnermullu Pisortaqarfimmi pisortaq Amalie Jessen oqarpoq, nutaalianik arfanniarnermut naleqqussakkanik kalaallit sakkoqarnerat qaammammi tullermi ataatsimeersuarnermi erseqqissaatigineqarumaartoq, taamaattumillu arfanniartartumik misilittagalimmik ataatsimeersuarnermi nassuiaasussamik peqataatitaqarnissartik pingaartissimagitsik.
Aalisarnermi Piniarnermilu Naalakkersuisoq peqquteqavilluni ataatsimeersuarnermi peqataassanngilaq.