Arfanniaq IWC-mi nassuiaassaaq

Arfanniarneq pillugu ataatsimiititaliarsuaq IWC, qaammatip tulliani ataatsimiilerpat Aalisarnermut Piniarnermullu naalakkersuisoq, Finn Karlsen, nunatsinnit peqataassanngitsoq, pisortaqarfimmi pisortap, Amalie Jessenip, nalunaarutigaa. Arfanniartartoq, Leif Fontaine, taarsiullugu peqquteqartumik peqataatinneqassaaq.

-Nutaalianik arfanniarnermut naleqqussakkanik sakkoqarluta arfanniartarnerput ataatsimeersuarnermi apeqqutigiumasat siumungaaq allaganngorlugit nassiussat tunngavigalugit akiniagassaqarpugut.

Taamaammat arfanniartartumik misilittagalimmik ataatsimeersuarnermi nassuiaasussamik peqataatitaqassaagut, Aalisarnermi Piniarnermilu pisortaqarfiup pisortaa Amalie Jessen nassuiaavoq.

Isumaqarnerarportaaq ukioq manna ataatsimeersuarnermi arfanniarnermi sakkut pingaarnerutillugit oqallittoqassammat, pisariaqanngitsoq Aalisarnermut, Piniarnermullu naalakkersuisup peqataanissaa; aappaagumi aatsaat nunatsinni arfattassat amerlassusissaat oqaloqatigiissutigineqassammata.

Ukiormanna ilisimatuussuseq tunngavigalugu Pinngortitaleriffiup misissuinerisa inerneri nalilersorneqassapputtaaq.

-Ukioq kingulleq biologit misissugaasa inerneri ukiunut siuliinut sanilliullugit paasisat saqqummiunneqassapput – aappaagulu ataatsimiititaliarsuup arfanniartarnitsinnik sunik ippigisaqarnertik, uagutsinnullu akornusersuutigisinnaasaminnik uparuagassaqarnerusut paasinarsiumaartoq, Amalie Jessen radioavisimut oqaluttuarpoq.

Ataatsimeersuarnissami naalagaaffiit arfanniartartut sinnerlugit Danmarkip aallartitarissavai Aalisarnermi Piniarnermilu Pisortaqarfimmi atorfillit pingasut, KNAPK-llu peqataatitaa ataaseq.

Ukiuni siuliini aalisarnermut, piniarnermullu naalakkersuisuusartut ataatsimeersuarnerni peqataasarsimapput.