Arctic Winter Games 2016 aningaasaliisussarseqqippoq

Eqqartuussissuserisutut suliffeqarfiup Meinelip AWG 2016-illu isumaqatigiissutaat, aningaasaliinissamik isumaqatigiissut Tulugaq, AWG-ip 2016-imi naammassineqarnissaata tungaanut atuutissaaq, Eqqartuussissuserisutut suliffeqarfik Meinel tusagassiorfinnut nalunaaruteqarluni taama allappoq.

 - AWG 2016-imut aningaasaliinissatsinnik periarfissinneqaratta ingerlaannaq akuersivugut. AWG 2016 aaqqissuussineruvoq Nunatsinni timersornermut pitsaalluinnartoq, aaqqissuussinerullu naammassineqarluarnissaanut peqataanissarput qilanaareqaarput, Finn Meinel, ilaatigut isumaqatigiissutip atuunnerani inatsisitigut nalinginnaasumik siunnersuisussaq isumaqatigiissusiornermilu suliaqarnermi ikiuuttussaq oqarpoq.

Arctic Winter Gamesimi General managerip, Maliina Abelsenip, tapersorneqarnissaq nuannaarutigaa.

- AWG 2016-ip allattoqarfiata isumaqatigiissuteqartoqarneratigut suliamut piukkunnarluinnartumit inuussutissarsiornermut tunngatillugu inatsisilerinikkut siunnersorneqartussanngornera toqqissimanarteqaarput. AWG 2016-ip tungaanit Eqqartuussissuserisutut suliffeqarfiup Meinelip misilittagaasa pitsaalluinnartut atorluarsinnaaneri nuannaarutigaarput. Kalaallit suliffeqarfiisa taama amerlatigisut AWG 2016-imik tapersersuerusunnerat assut nuannerpoq, tamannami pitsaanerpaamik aaqqissuusinissatsinnut iluaqutigissagatsigu.