Arctic Umiaq Linep siunissaa aalajangiiffigineqassanngikkallarpoq
Nalunaaqutaq 11.45 nutartigaq
Umiarsuaatileqatigiiffimmut aningaasanik immikkut tapiissuteqarnissaq naalakkersuisut ullumi ataatsimiinnerminni isummerfigisussaagaluarpaat, naalakkersuisullu siulittaasuata Kuupik Kleistip angalanera peqqutaalluni aalajangiinissaq kinguartinneqarpoq.
Paasissutissat ataasiakkaat aamma pissarsiarineqaqqaartussaasut, angallannermut naalakkersuisoq Jens B. Frederiksen oqarpoq.
Air Greenlandip Arctic Umiaq Linemik piginneqataajunnaarnissani sapaatip akunnera kingulleq nalunaarutigaa. Umiarsuaatileqatigiiffiup aningaasatigut amigartooruteqarnera taamatut aalajangernermut tunngavilersuutigineqarpoq.
Sarfaq ittuk atorlugu Nunatta kitaani angallassineq, Arctic Umiaq Linemit isumagineqarpoq, umiarsuaatileqatigiiffillu Royal Arctic Linemit Air Greenlandimillu pigineqarluni.
Arctic Umiaq Linep ataannarnissaa naalakkersuisunit sulissutigineqarnersoq Siumumit tusagassiuutinut nalunaarummi ullaap tungaani nassiussami, apeqqutigineqarpoq.
- Nunatsinni sinersortaatituarsuaq maanna pigineqartoq soorunami inuiaqatigiinni pigiinnassavarput, Aleqa Hammond ilaatigut oqarpoq.