Arctic Umiaq Linemi ulapputtut
Arctic Umiaq Line aappaagu marsip 29-nniit allarteqqinissaanut suna tamarmi iluatsinniassammat ulapputtoqarpoq, Arctic Umiaq Linemi pisortaaneq Jette Larsen oqarpoq. Angalatitsiviit Profilrejser Air Greenlandilu Arctic Umiaq Linep isumaqatigiissuteqarfigereersimagai. Profilrejser Danmarkimi inissisimaffeqarpoq, takornarnianillu Narsarsuarmiit Ilulissat tungaannut angallassisarnissi neqeroorutigisimavaa.
Kalaallit Nunaanni Angalatitsivik aamma neqerooruteqarsimavoq, neqeroorutigalugu takornarniat Danmarkimiit Nuummut ingerlattarnissaat, tikeraallu ullut arlallit Nuummeeriarlutik sinersortaat atorlugu Ilulissiarsinnaassapput, ullunilu arlalinni Ilulissaniissinnaassallutik.
Arctic Umiaq Linep Timersortartut Kattuffiat, poorskikkunni pissartanngorniunnermi peqataasussat eqqarsaatigalugit isumaqatigiissuteqarfigereersimavaa.
- Umiarsuarmi naalagassat inissititernerat naammassiliivippoq, inuttassat atorfinitsinnissaat tullinnguuppoq, taakku kalaalersaqarnissaat aamma anguniarparput, Jette Larsen oqarpoq.
Sinersortaatit ulapputiginerisa saniatigut qarasaasianut tunngasut aamma ulapputigineqarput. Anguniarneqarpoq angalaniartut januaarip ulluisa aallaqqaataaniit nittartakkakkut inniminniisalersinnaanerat.
