Arctic Umiaq Linemi sulisut sinniisaat soraarsitaatinnani allamik suliffissarsiornianngilaq

- Umiarsuaatileqatigiiffiup siusinnerusukkut ilisimatitsisoqarneratigut tusagassiutitigullu eqqartorneqarneratigut immaqa tusarsimassavat, Arctic Umiaq Line A/S atoruminaatsorsiulersimavoq. Umiarsuaatileqatigiiffiup sullissinissamik isumaqatigiissutaata 2005-ip kingorna sivitsorneqannginnissaanik naalakkersuisut aalajangernerata kingorna tamatuma peqatigisaanik ingerlatseqatigiiffiup pisortai naalakkersuisut qinnuigisimavai umiarsuaatileqatigiiffiup 2005-ip kingorna niuernikkut nutaamik tunngaveqarluni ingerlateqqinneqarnissaanut periarfissanik misissueqqullugit.

Taama ilaatigut isikkulimmik Arctic Umiaq Linemi sulisut allagarsisimapput. Sulisut neqeroorfigineqarput qaammammusiat pingasut assigisaannut sulisut akissarsiumaartut. Umiarsuaatileqatigiiffimmi sulisut sinniisaat Frederik Reimer, isumaqarpoq, sulisut neqeroorfigineqarnerat sunniuteqarfissamigut sunniuteqassasoq. Namminerli soraarsitaatinnani allamik suliffissarsiornianngilaq.

Frederik Reimer aperigatsigu allagarsiatik qanoq isumaqarfiginerai akivoq, nammineq isumaqarluni inuttat ingerlaannarnissaannut kajumissaarutaasoq, killissaa tikillugu ingerlatitsiniarnermut tunngassuteqarluni. Inuttat maanaannaq soraaralissagaluarpata inuttassaqarniarnerup ingerlasinnaanissaa ajornakusoortorujussuanngussammat. Assersuutigaa aquttoq ataaseq imaluunniit matrosi ataaseq niuppat, taamalillutillu pissaarullutik, taava umiarsuaq ingerlasinnaanngimmat.