Arctic Umiaq Line ualeru isummerfigineqassaaq

Inatsisartut Aningaasaqarnermut Ataatsimiititaliaa ippassaq unnukkut sivikitsumik ataatsimiippoq, Arctic Umiaq Line-p tuniniarneqarneranut atatillugu apeqqutit imartuut arlalissuit Naalakkersuisuugallartut siulittaasuata Hans Enoksenip ataatsimiinnermi akissuteqarfigisussaagaluarlugit.

Hans Enoksenili Upernaviup eqqaani angalanini pissutigalugu ataatsimeeqataasinnaanani nalunaarpoq, apeqquteqaatillu pappialatigut akissuteqarfigineqaannarlutik. Akissutilli nassiunneqartut danskisuinnaq allassimammata kalaallisut aamma allassimanissaat nalinginnaasumik piumasaqaataasarmat ataatsimiinnissaq ualeru nalunaaqutaq tallimanut kinguartinneqarpoq.

- Hans Enoksen peqataasinnaanissaa ilimananngilaq, apeqquteqaatigisimasavullu naammaginartumik akineqarsimanersut isummernissatsinnut apeqqutaassaaq. Pisariaqassappat ataatsimeeqqissinnaassaavut, kisianni aamma imaassinnaavoq ualeru aalajangertugut. Aningaasaqarnermut Ataatsimiititaliap siulittaasua Simon Olsen ullaap tungaa oqarpoq.

Aningaasaqarnermut Ataatsimiititaliaq Arctic Umiaq Linep tunineqarnissaanut akuersissappat tunisinissaq piviusunngussaaq.