Arctic Umiaq Line tunineqarpoq

Allattoq Mads Lynge
septembarip 26-at 2006 16:55

Arctic Umiaq Line-mik piginneqatigiiffiup Arctic Travel Group A/S-ip sinersortaatinik imminut akilersinnaasunngortitsiniaanera iluatsinngitsoorpoq, selskabilu sinersortaatillu Namminersornerullutik Oqartussanut tunineqarput.

Vagn Andersen siulersuisunut siulittaasutut toqqarneqarpoq, Sarpik Ittuk, Sarfaq Ittuk, kiisalu Disko 2-p allanut attartortinneqarlutillu Danmarkimi amutsivimmiitsinneqartut nunatsinnut aappaagu apriilip qaammataani uteqqissapput.

Arctic Travel Groupip siulersuisuinut siulittaasup Søren Rasmussenip tamanna ima nassuiaatissaqartippaa:

- Ajorsinnaasut tamarmik ajorput. Timmisartuussisarnerput iluatsitsiffiusimanngilaq. Billetsit amerlanersaasa akikitsuinnarmik tunisariaqartarsimavagut, tamannalu pissutigalugu annaasaqaatigut annertusimallutik, Arctic Travel Groupip siulittaasua Søren Rasmussen radioaviisimut oqarpoq, nangillunilu:

- Sarpik Ittuk-p Kangerlussuaq aqqusaarlugu angallavia iluatsissimanngilaq, umiarsuullu allanngortinneqarsimanera ATG-mut iluaqutaasimanani. Arctic Umiaq Line-p ATG-mut tunineqannginnermi siorna Sarpik Ittuk allanngortinneqarsimavoq, 272-inik ilaasoqarsinnaasimariarluni 158-iinnarnik ilaasoqarsinnaatilerlugu, tamanna pissutigalugu imminut akilersinnaasunngortinniarneqarnera ajornakusoorsimalluni, Søren Rasmussen oqarpoq.

Taanna aamma oqarpoq nunatsinni sinersortaatinik angallassinermi Arctic Travel Group sukkavallaamik ineriartortitsisimasoq, pissutsillu malinnaavigineqarsimanngitsut.

Arctic Travel Groupip annaasaqaatai 30 millioni koruunit missaanniissasut Søren Rasmussenip ilimagaa.