Arctic Umiaq Line tunineqarpoq
Arctic Umiaq Line danskit angalatitseqatigiiffissuannut Arctic Travel Groupimut tunineqarpoq. Inatsisartut Aningaasaqarnermut Ataatsimiititaliaata siulittaasua Simon Olsen Qanoruumut ippassaq unnukkut oqarpoq, tuniniaanermut Naalakkersuisut innersuussutaat Aningaasaqarnermut Ataatsimiititaliap akuersissutigisimagaa, sisamat akuersisimapput ataaseq akerliulluni.
Aningaasaqarnermut Ataatsimiititaliap akuersissutaa kingulleq ullumi kingusinnerusukkut tamanut saqqummiunneqassaaq, nittartakkatikkut takuneqarsinnaassalluni, uani: www.nanoq.gl
Apeqqutit isumaqatigiissummut tunngasut 15-it Aningaasaqarnermut Ataatsimiititaliamit akissuteqarfigeqquneqartut aamma saqqummiunneqassapput, soorlu aamma Aningaasaqarnermut Ataatsimiititaliap akissutit Naalakkersuisuugallartunit pissarsiaat saqqummiunneqassasut.
Aningaasaqarnermut Ataatsimiititaliami ilaasortat tamarmik immikkut apeqquteqaatinut oqaaseqaatissaminnik allattuinissaminnut periarfissinneqassapput.
