Arctic Umiaq Line tunineqarpoq!

septembarip 05-at 2005 17:53

Arctic Travel Group Air Alpha-mit Danmarkimilu angalatitsivinnit pingasunik piginneqateqarluni ukiortaamiit Arctic Umiaq Line pisiarissavaat.

Arctic Travel Groupimi siulittaasoq Poul Lübbert Air Alphami pisortaanerusoq radioaviisimut oqarpoq angalatitsiviup angallanniagai pingasunut agguarneqarsinnaassasut:

Tassalu takornariat, aammalu Kangerlussuarmiit Kangerlussuarmullu umiarsuamik ingerlariarlutik timmisartumut ilaalluni Københavnimut attaveqartartut kiisalu nunaqavissut sinerissamut umiarsuarmut ilaallutik angalasartut.

Angalatitsiviit takornarianik sullissisartut Profil Rejser, Albatros kiisalu Topas Adventure Travel Arctic Travel Groupemut piginneqataapput, taakkualu aaqqissugaanni illoqarfiit aaliangersimasut tikittarlugit takornariaataa angalanissanik aalajangersimasunik akilerlugit tuniniaallutik neqerooruteqartalerniartut piginneqartigiiffiup siulittaasua Poul Lübbert oqarpoq.

Arctic Umiaq Linemi sulisut pisinermut ilaassanersut suliffeqarfiullu pigisai suut ilanngullugit pisiarineqassanersut oktoberip qiteqqunnerata tungaanut isumaqatiginninniutaassasut Poul Lübbert oqarpoq. Qitiusumilli allaffik Nuummi inissisimassasoq oqaatigereersinnaanerarpaa.