Arctic Umiaq Line-p tunineqarnissaa ullumi naalakkersuisut aalajangiuppaat
Periarfissat allat pisinnaanngippata Naalakkersuisut siulittaasuata Hans Enoksen-ip Arctic Umiaq Line-p tunineqarnissaa aalajangiusimavaa.
Arctic Umiaq Line-mik ingerlatsisut septemberip aallaqqaataa tikitsinnagu pilersaarummik saqqummiussissapput, tapiissuteqarani qanoq ingerlasinnaanerlutik. Tamatuma kingorna tuniniarneqassaaq, namminersortutullu ingerlasinnaanngikkuni matusariaqassalluni.
-Uani siulersuisunut periarfissiivugut piaarnerpaamik ataatsimeersuassasut, tassanilu innersuussutigaarput siullermik, tuniniarneqarsinnaasoq, aappassaanik iluanaaruteqarluni ingerlatsiinnarnissaanik periarfissinneqassasoq, taavalu pingajussaanik matuneqassasoq. Taamatut tunngaviliinitsinnut pissutigaarput aningaasaqarnermut ataatsimiititaliap tamakkiisumik akuersinermigut periarfissimmatigut Arctic Umiaq Line-mut 2006-p ingerlanerani isumaqatigiissuteqaqqissanngitsugut, Hans Enoksen oqarpoq. Nunani avannarlerni ilisimatooq Lise Lyck radioaviisimi apersorneqarnermini oqarpoq, Arctic Umiaq Line namminersortutut ingerlasinnaanngitsoq, Hans Enoksen-illu oqariartuut tamanna tupigusuutigaa.
-Nunani avannarlerni ilisimatuut qasseriarlutimmita oqaatigisarpaat nunatsinni namminersornerullutik oqartussat ingerlataat namminersortunngorsartariaqartut. Namminersortunngorsaasoqalermat aamma allatut oqaluttoqalermat tupinnalaarpoq. Kisianni inuiaqatigiinni aningaasat killeqarmata allamik periarfissaqarsimanngilagut, Hans Enoksen oqarpoq.
Arctic Umiaq Line-mi ataatsimeersuarnerit pereerpata siunnerfissamillu tikkuussereerpata taava kingunissai eqqartorneqaqqikkumaartut Hans Enoksen-ip oqaatigaa.
Arctic Umiaq Line-mi siulittaasoq Niels Kreutzmann oqarpoq, kiffartuussinermut tapiissutit 2006-miit pisarunnaarunikkik ingerlaannarnissaq ajornakusuussasoq, misiliissallutilli oqaatigalugu. Sulisulli sulisoriinnarnissaat ajornarsinnaasoq ilanngullugu oqaatigaa, siunissartik qanoq inissisimanersoq nalunarmat.
