Arctic Umiaq Line-p tunineqarnera Naalakkersuisut tamarmik naammagisimaarpaat

novembarip 03-at 2005 15:09

Arctic Umiaq Line tunineqarpat iluaqutissartai Naalakkersuisuugallartut siulittaasuata Hans Enoksenip iluarisimaarpai, Inatsisartulli aningaasaqarnermut ataatsimiisitaliaani ilaasortaasup Per Skaaningip aalajangigassaq taama pingaaruteqartigisoq taama nukingiunneqartiginera iluarinngilaa.

- Annertuumik iluaqutissartaqarpoq, siullermik qulakkeerneqaqquarput sulisut suliinnarnissaat piumasaqaatinut ilanngunneqassasut, taavalu nunaqavissut angallanneqarnerat taanna isumannaarlugu aaqqinneqassasoq, Hans Enoksen oqarpoq.

Nangipporlu:

- Taassuma saniatigut 60 mio. koruunit tungaanut tapiissutigisartakkavut atorunnaartussaapput, taakku inuiaqatigiit iluanni allanut nuunneqassapput, taassuma saniatigut avataaninngaanniit takornarissat amerlinerisigut aningaasat annertuumik isaatinneqalertussaapput nunap sinnerani aamma suliffissaqartitsineq takornariaqarnikkut annertusarneqartussanngussaaq. Inuiaqatigiit iluanni aningaasat annertuut kaavitinneqalertussaapput, tassami aamma toqqaannartumik timmisartuussinerit Ilulissanut Kangerlussuarmut Narsarsuarmullu ilanngullugit tapiissutitaqanngitsumik aaqqittussanngormatigit, Hans Enoksen oqarpoq.

Naalakkersuisuugallartut taama siunniutaqaraluartut tamanna aningaasaqarnermut ataatsimiisitaliamut aamma ingerlatinneqaqqaartussaavoq.

- Tassa tunineqarnissaa aalajangiunneqarpoq, kisianni soorunalimi aningaasaqarnermut ataatsimiisitaliamut ingerlatinneqartussaavoq, tassani tunineqarnissaa naqissuserneqartussaavoq, Hans Enoksen oqarpoq.

- Ilimaginngilara ullumikkut oqaluuserissagipput, nalunngilara Naalakkersuisut ullaap tungaani qulinut ataatsimiissutigigaat.

Arctic Umiaq Line-p tunineqarnissaa pineqartillugu mio. Koruunerpassuillu pineqartillugit suliarinissaanut piffissaqarnerusariaqarpugut.

Suliarinissaanut 20 minutsi sioqqullugu suliakkerneqassagutta aappimik naamimilluunniit akissuteqarsinnaanngilanga, piffissaqarnerusariaqarpungami, taama oqarpoq aningaasaqarnermut ataatsimiisitaliami ilaasortaq Demokraatineersoq Per Skaaning.

Ilanngutassiap suliarinerata nalaani aningaasaqarnermut ataatsimiisitaliap siulittaasua Simon Olsen tutsiuppoq, nalunaarutigalugu aningaasaqarnermut ataatsimiisitaliap tamanna sapaatiuppat ataatsimiissutigissagaa, taamanikkussamullu qulakkeerneqarnissaanik neriorsuuteqarsinnaannginnerarpoq .

Umiarsuit pingasuutillugit pisiarineqaqqaaramik 210 mio. koruuneqarsimagaluarput, tallineqaramillu aamma 80 mio. koruuneqarsimallutik.

Tassa katillugit 290 mio. koruuneqarsimagaluartut maanna 65 mio. koruunilerlugit tunineqarnissaat Naalakkersuisut isumaqatigiissutigaat.