Arctic Umiaq Line atorunnaassagaluarpat taarsernissaanut Air Greenland nukissaqarpoq

- Arctic Umiaq Line ukiup tullianiit atorunnaassagaluarpat taarsissallugu nukissaqarpugut.

Taama oqarpoq timmisartuutileqatigiiffiup Air Greenlandip pisortaanera, Flemming Knudsen. Taamaakkaluartorli qanoq pilersaaruteqarnerlutik maanna oqaaseqarfiginianngikkallarpaa, siunissaq qularnaannerulerpat oktoberip ulluisa aallaqaataanni oqaaseqarfigisinnaalissallugu Flemming Knudsen-ip ilimagaa.

Unammilleqatigiinnermi paasinarsisussaavoq umiarsuarnik angalasoqartassanersoq angalasoqartassannginnersorluuniit. Septemberip ulluisa aallaqqaataanni tusartussaavarput umiarsuarmik angalasoqartassanersoq, taamanikkullu aatsaat paasinarsissaaq qanoq annertutigisumik unammillersinnaanersugut, Flemming Knudsen oqarpoq.

Timmisartoq qulimiguulik S61 nutaaq attartorneqalissagunarpoq, Paamiunimi mittarfeqalissagaluarpat taanna aatsaat atorfissaqartinneqalissammat.

Timmisartut qulimiguullit akunnattumik angissusillit, qulingiluaniit aqqaneq’marluk tikillugit ilaasoqarsinnaasut, kingusinnerusukkut aamma pisiarineqassapput. Timmisartut manna atorneqartartut ilaat taakku taarsissavaat, sulili aalajangiunneqanngilaq timmisartut pisiarineqartussat taakku assigiinngitsut pingasut fabrikimit sorlermeersuussanersut.

Flemming Knudsen aperigatsigu timmisartunik nutaanik pisereernerup kingorna sumut qanorlu atorneqartassanersut, takornariaqarneq eqqaavaa.

Qaammatip uuma aallartilaarnerani Nunatta kujataani Qeqertarsuullu Tunuani qulimiguulimik angallassisarnermut tunngasunut Air Greenland ajugaavoq.