Arctic Umiaq Line atorunnaarsinneqassappat inuiaqatigiinnut tamanna allanngortitsilluinnarsinnaasoq

Umiarsuaatileqatigiiffiup, Arctic Umiaq Line-p, Namminersornerullutik Oqartussanit pigineqartup, atorunnaarsinneqarnissaanik naalakkersuisut aalajangernerat, kalaallinut inuiaqatigiinnut allanngortitsilluinnarsinnaavoq.

Taama oqarpoq nunani avannarlerli aningaasarsiornermut ilisimatooq, Lise Lyck.

- Siullermik soorunami oqarsinnaavugut, taamatut pisoqarnerani akit qaffassammata.

Aappassaanik oqarsinnavugut, Kalaallit Nunaanni angallanneq annikinnerulissasoq, aammalu inuit aningaasarsiaqarpallaanngitsut angalanissaminnut periarfissaqarpallaarunnaassapput, pingaartumik sumiiffinni inoqarpallaanngitsuni, tassami umiarsuarnik timmisartumillu angallassinermi amerlasuunik ilaasoqarsinnaanngikkaanni tamanna akilersinnaanngimmat, Lise Lyck oqarpoq.

Taanna aperaarput, umiarsuaatileqatigiiffik naalagaaffimmit tapiiffigineqarani, imminut aningaasalersornikkut, immaqa ingerlasinnaassagaluarnersoq. Lise Lyck akivoq, taamaattoqassappat sumut sumiillu angalanissaq soorunami apeqqutaassasoq. – Takusareerparpummi sumi tamaani namminersortunngorsaaneq, imaappormi timmisartukkut umiarsuakkulluunniit angallassiniaraanni soorunami akilersinnaasariaqarpoq, aammalu innuttaasut periarfissaqartariaqarput akisuallaanngitsumik angalanissaminnut, inoqarpormi timmisartornissaminnut periarfissaqanngitsunik, nunani avannarlerni aningaasarsiornermut ilisimatooq, Lise Lyck, oqarpoq.