Arctic Umiaq Line 65 million koruunilerlugu tunineqarpoq

Arctic Travel Groupip Arctic Umiaq Line 65 million koruunilerlugu pisiaraa.

Arctic Umiaq Linep tuniniarneqarnerani isumaqatiginninniarnerit naammassipput, danskit suliffeqarfiutaanni Arctic Travel Group-imi siulittaasoq Søren Rasmussen taama oqarpoq.

Arctic Travel Group oktoberip 14-ani neqeroorummik tunniussimmalli isumaqatiginninniarnerit aallartipput. Søren Rasmussenilu Nuummut ippassaq tikippoq isumaqatigiissut inaarsariartorlugu.

Isumaqatigiissut allanngortinneqarsinnaanngitsoq, Søren Rasmussen Radioaviisimut oqarpoq.

Isumaqatigiissut atsiorneqartinnani Arctic Umiaq Linep siulersuisuinit Namminersornerullutillu Oqartussat aningaasaqarnermut ataatsimiititaliaannit akuerineqaqqaassaaq.

Tamaannalu ulluni tulliuttuni pissaaq.

Arctic Umiaq Line siunissami Uummannap Narsarsuullu akornanni angalassasoq Arctic Travel Groupip siulittaasuanit oqaatigineqarpoq.

Bilitsillu akisunerulernavianngitsut erseqqissarpaa.

Sinersortaatit angalaneranni pisortanit taperneqartartussaannginnamik takornariat umiarsuarnut ilaatillugit aningaasarsiutiginiarlugit eqqarsaatigaat.

Søren Rasmussenip ilimaginngilaa 2006-imi sinneqartoornissartik.