Arctic Umiaq Line 4 koruunilerlugu utertippaat
Arctic Umiaq Linep siulersuisortaavi ullaap tungaani siullermeersumik ataatsimiipput. Siulittaasoq Vagn Andersen oqarpoq ataatsimiinneq piginneqatigiiffimmi pigisat naleqartitat qularnaarneqarnissaannik imaqartoq.
Arctic Travel Groupip Arctic Umiaq Line ukioq ilivitsuunngitsorluunniit ingerlatereerlugu 30 million koruuninillu amigartoorutigereerlugu Namminersornerullutik Oqartussanut ippassaq utertippaa.
Arctic Umiaq Line 4 koruunilerlugu utertinneqarpoq, piginneqatigiiffiit sisamat Arctic Travel Groupimik piginittut tamarmik 1 koruunimik akiliiffigineqarlutik.
Arctic Umiaq Linemi siulersuisunngortut suliassaat tulleq tassaavoq, nunatta kitaata sineriaatigut sinersornerup aappaagumut qanoq nanginneqarsinnaanissaa misissuiffigissallugu.
Arctic Umiaq Linelu ingerlaqqissanersoq qanittukkut ilisimatitsissutigissagini, siulittaasua oqarpoq.
