Arctic Umiaq Line 2 mio. kr.-inik amigartuussaaq

Arctic Umiaq Line-p siunissaa pillugu ulluni qaninnerni aalajangiisoqassasoq, naalakkersuisunit neriorsuutigineqareersimalerpoq.

Apeqquserneqartussaassaarlu, namminersortunngorsaanerigaluaq iluatsinngitsoq ingerlatiinnarneqassanersoq imaluunniit…..!

Ullut qulingiluat matuma siorna Arctic Travel Group-imiit tupaallaatigineqaqisumik nalunaarutigineqarpoq Arctic Umiaq Line Namminersornerullutik Oqartussanut utertikkitsik.

Taamanili ajornartorsiutip tamatuma qanoq ililluni aaqqiivigineqarnissaa siulersuisunit iliuuseqarfiginiarneqalerpoq.

KNR TV-mili Itisiliineq ippassaq aallakaatinneqarmat Arctic Umiaq Line-p siulersuisuni siulittaasup Vagn Andersenip iliuusissamik pilersaarut kiisami oqaatigaa.

- Naatsorsuutinik suliaqareerpugut oqaatigisariaqarparali naatsorsuutit taakku utaqqiisaagallartumik naatsorsuutaammata. Aallakaatitsivimmut isinngitsiarlunga paasitinneqarpunga Sarfaq ittuk ukioq ilivitsungajak tassa qaammatini qulingiluani tulliuttuni sinerissami angalatissinnaagipput.

Piffissamilu tassani Sarfaq Ittuk 24.000-inik ilaasoqarsinnaavoq, takornariallu 800-t missaat ilaasorineqarsinnaapput.

Taamalu utaqqiisaagallartumik ukiumut naatsorsuinitsinni 2 mio. koruunit missaat amigartoorutigisussanngorpavut, Vagn Andersen oqarpoq.

Itisiliinermi ippassaq Vagn Andersenip taama oqarpoq.

Ineqarnermut Aatsitassanullu naalakkersuisoq Jørgen Wæver Johansen oqarpoq, amigartoorutinut sillimmasiineq aaqqiissutaasinnaasutut pitsaasutut isigineqarsinnaasoq. Taannattaaq oqarpoq ukiut pingasut ikaarsaariarfiusinnaasutut isigineqarsinnaasut. Taamalu amigaartorutinut sillimmasiineq amigartoorutaasussanut killiliinerussallutik.