Arctic Team Challenge ingerlalluarpoq

juulip 18-at 2005 05:26

Unammineq sakkortooq, Arctic Team Challenge-mik taaneqartartoq, Tasiilami ingerlanneqartoq maannamut ingerlalluartoq aaqqissuisunit nalunaarutigineqarpoq.

Tasiilarmiut unamminermi tinnersaallutik malinnaalluarsimanerat pissutissaqarluarunavippoq, unamminermi nunatsinneersut holdit marluk maannamut siuartuni ilaammata.

Ullaatungaani nalunaaqutaq qulingiluanut ullut pingajussaannik arpannerit aallartissapput, mountainbikenik cykeleqqaariarlutik, qaqqami arpassallutik.

Ippassaq unamminerup ulluisa aappaanni arpatitsinneq unnukkut arfineq-pingasut qeqqata missaanni naammassivoq – arnat unammeqataasut nunatsinneersut Arctic Ladies aamma holdit Afrika Kujataaneersut Jabberwok kingullerpaallutik apuummata. Ippassaq arpattut ilaatigut Qimmertaajaliip Qaqqartivata tungaanut ipupput qaqqarsuarlu 1.000 meterinik portutigisoq qaqeriarlugu utimut aamma ipullutik.

Unamminermi Nuummeersut Tasiilameersullu PharmaNord/Inu:IT siuaqqapput.

Arctic Team Challenge Tasiilami ingerlanneqartoq pingasunngorpat naggataarnersiorneqassaaq.