Arctic Team Challenge filmiliarineqarpoq

Filmimi ”Our Arctic Challenge”-imi nunarsuarmi unamminerit sakkortunersaat Tasiilap eqqaani ingerlanneqartartoq sammineqarpoq. Timersorneq avatangiisillu pillugit filmiliaq, 52 minutsinik sivisussusilik, EU-p Avatangiisit pillugit suliniuteqarfianit aningaasalerneqarsimasoq EU-mit aallartitanit minnerunngitsumillu Kunngissamit nuannarineqaqaaq.

- TV-kkut isiginnaagassiorneq takornarianut piumasaqartuartunut pilerisaarutigissallugu tulluarnerpaavoq, Tasiilami takornariaqarnermut pisortaq, Arctic Team Challenge-millu aaqqissuisoq, Anders Stenbakken, filmip Københavnimi takuteqqaarneqarnerani oqarpoq.

Naluara sooq annertuunik aaqqissugaqartilluta TV-kkut aallakaatitassiorneq atorluartarsimannginneripput. Aallakaatitassiornermimi illit nammineq katitereqataasinnaavutit, pilerisaariniarnernullu tulluarsarsinnaallugu. Tusagassiortut oqaloqatiginerini imaluunnit aviisitigut pilerisaarininni qaappiaavallaamik saqqummiussisarpugut, ilaannilu nuannarinngisannik oqaatsit pisullu saqqummiunneqarsinnaallutik. Pilerisaarerusukkutta unammeqataajartortuniit takornarianilluunniit allanik pitsaanerusunik aallartitatullusooq pissaqanngilagut, taakku oqaluttuaat aallakaatitarigaanni pilerisaarutitsialaavoq.

Timersorneq avatangiisillu pillugit filmiliaq nunarsuarmi TV-qarfinni assigiinngitsuni aallakaatinneqalersaarpoq. Filmi oqaasertalersorneqareerpat KNR-TV-p aallakaatissamaarpaa, soorlu BBC world-ip, CNN-ip, Al Jazeera-p, ABC-p, Fox Newsillu aallakaatikkusuppaat.