Arctic Round Table: Nuummi periarfissatsialaat

Inuit 19-it issittumi inuussutissarsiornermut ineriartornermullu tunngatillugu immikkut ilisimasallit sapaatip-akunnerata siuliani Katuami ataatsimoornerminni, Nuuk illoqarfik issittumi inuiaqatigiinnik assigiinngitsunik inoqarfinngornissaanut isumassarsioriartorlutik naapeqatigiipput.
 
Nuummi sumut ineriartortoqarnersoq suliffeqarfiit issittumi ingerlatserusuttut qularatik misiginiassammata, Nuummi innuttaasunut pingaaruteqartuusoq tassaavoq, illoqarfiit pingaarnersaasa ineriartortinneranut ataatsimoortumik periusissaqarnissaq peqataasunit isumaqatigiissutigineqarpoq.  

Illoqarfiit pingaarnersaattut siuariartornissamut aporfiusartoq, Kalaallit Nunaanni Nuup illoqarfiillu akornanni pissutsit oqallisigineqarputtaaq.

Peqataasut ilaannit nunani allameersumit erseqqissaatigineqarpoq, nunat illoqarfittut pingaarnersatik qanoq pingaaruteqartiginersut aammalu nunanit allaneersunit qanoq tikerarneqartartiginersut.

Assersuutigalugu Reykjavik Islandimut Københavnilu Danmarkimut aningaasatigut siuariartornissamut pingaaruteqangaarsimapput.

Inerniliussat illoqarfiit pingaarnersaat pillugu periusissap suliarinissaanut atorneqassasut

Borgmesteri isumasioqatigiinnermik iluarisimaarinneqisoq naggasiilluni oqalugiarpoq.

- Illoqarfitsinni periarfissaqaqisoq Silarsuatta sinneranit immikkut ilisimasalinnit takuneqarsinnaasoq nuannaarutigeqaara. Paasisat iluaqutaassaqaat, Asii Chemnitz Narup tusagassiorfinnut nalunaaruteqarluni taama allappoq.

Kommunalbestyrelsip ukioq kingulleq illoqarfiit pingaarnersaat pillugu periusissap suliarinissaanut aalajangiussaani ataatsimeersuarnermit eqikkaanermi oqariartuutigineqartut ilanngunneqassapput.

Isumasioqatigiinneq Arktisk Round Table siunnersuisarfimmit Rambøllimit aaqqissuunneqarpoq ukiullu tamaasa Nunat Issittut illoqarfiisa ilaanni ingerlanneqartarluni.