Arctic Policy and Economic Forumimi ataatsimiinneq siulleq Københavnimi pissaaq
Ataatsimeersuarnerullu illumi tassanerpiaq pinissaanut peqqutaavoq, Danmarkimi umiartortut Issittoq soqutigisorujussuummassuk - tassa Tunup avannaatigut Sullualukkullu umiartorneq eqqarsaatigalugu, aammali Kalaallit Nunatsinni aatsitassarsiornissap ineriartornerani aningaasarsiornissap ineriartornera, eqqarsaatigalugu.
Nunat assigiinngitsut akornanni tamanna aamma soqutigineqaqaaq.
Arctic Policy and Economic Forumip, pilersinneqaqqammersup, aningaasarsiornikkut ineriartornerup ataqatigiissaarnissaa, Issittunilu imaatigut siunissami angallaffissat, ataatsimeersuarnermi qitiutissavai. Nunani tamalaani malunnaatilimmik inuussutissarsiortut, nunallu arlallit Danmarkimi sinniisaat, ataatsimeersuarnermi peqataassapput.
Arctic Policy and Economic Forum Issittoq pillugu arlaleriarluni paasititsiniaasareerpoq - ilaatigut Bruxellesimi - paasititsiniaanerillu umiartortunit suliffissuaatilinnillu assorsuaq soqutigineqarput. Issittumi aalajangiisartut inuussutissarsiortullu ukiut tamaasa ataatsimeersuartarnissaat anguniarneqarpoq, ataatsimeersuarnerullu nunami Issittumiittumi ukioq allortarlugu pisarnissaa takorloorneqarpoq, nunanilu issittuniinngitsuni, aningaasarsiornermillu soqutiginnittuni ukioq allortarlugu aamma pisassalluni. Issittumi sinerialinni naalagaaffittut Danmarkip ataatsimeersuartitserngaarnissaa pissusissamisoortuusoq tusagassiuutinut nalunaarummi allassimavoq.
Arctic Policy and Economic Forumimik aallarniisoq tassaavoq franskeq, nunap qanoq malittarisassaliorneranut inatsisit aqqutigalugit ilinniagaqarsimasoq, tikeraarlunilu Ilisimatusarfimmi siorna ilinniartitsisutut sulisoq, Damien Degeorges. Kalaallit Nunaata Issittumi pisussaaffia akisussaaffialu Damien Degeorgesip siusinnerusukkut aamma ilisimatusaatigisimavaa.
