Arctic Green Foodip Attumi tunitsivia matuvoq
Tunitsiviup matuata silataani allagarsiissummi novembarip 19-anni ima allassimavoq:
“Tassani pissutaavoq, ukiup sinneranut aningaasat atugassat nungoreerneri”, nalunaaruteqartuulluni Arctic Green Food A/S-ip pisortaa, Johanne H. Petersen.
Matusinermi aalisartut umiatsiaararsortut 20-it, Attormiullu 250-it missaanniittut ilungersunartorsiulerput
- Aalisartut aningaasarsiorunnaarpata akiligassat akilerniarneri ilaqutariinnut ilungersunarsissaaq, Jens Inuusuttoq, Attumi KNAPP-ip siulittaasua oqarpoq, nangillunilu:
- Akilersugassavut pisarnertut takkuttuartuupput. Inuuniarnermut, kiassarnermut assigiinngitsunullu eqquinerlussaaq, aalisarnermik inuussutissarsiutillit eqqarsaatigalugit. Nunaqarfimmi aqutsisut aamma ernummateqarput.
- Sunniuteqarnerluttussatut naatsorsorsinnaavarput, tassa ilaqutariit arlalippassuit aalisarnermik inuuniuteqartutut oqaatigineqarsinnaammata. Tunitsiveqarneq assut pingaaruteqarpoq, aammalu ingerlajuarsimagaluarluni.
Iluaqutigisimaqaarput, nunaqarfimmi aqutsisut siulittaasuat, Ole Abrahamsen oqarpoq.