Arctic Green Foodimi sulisut toqqissisimanngillat

Ikamiuni tunisassiorfik ulapaarfiup nalaani 15-it missaannik sulisoqartartoq maannakkut arfinilinnik sulisoqarpoq. Suliffissaaruttut Ikamiuni amerleqqinnissaat pisortaagallartup Arnaarannguaq Johansenip aarleqqutigaa.

Aalisartut piniartullu aamma periarfissaarunnissaat aarleqqutigalugu oqaatigaa. Akunnaamullu allatut ajornartumik tunisiartortariaqarnerarpai.

Qaanaamissaaq suliffeqarfimmi tallimanik sulisulimmi aamma ernumasoqarpoq. Pisortaasoq Hans Karlsen aamma ernumavoq:

- Piniartut tunitsivissaarutissapput aamma sulisut sisamaasut aningaasarsiorfissaarutissapput. Puisit amiinik tunisineq eqqaassanngikkaanni allanik periarfissaarutissapput.

Qaanaap borgmesteria Jens Danielsen aamma ernumavoq, tassa Savissivimmissaaq Arctic Green Food tunitsiveqarmat:

- Qilalukkat mattaanik neqiinillu tuniniaavigineqartarpoq, matuneqassappat piniartut annertuumik eqqorneqassapput. Aamma kommunit allat assigalugit tamaani suliffissaaleqisoqangaatsiarpoq, Borgmesteri Jens Danielsen oqarpoq.

Aningaasaqarnermut ataatsimiititaliap siulittaasua, Augusta Salling, ullumi oqaaseqartinniaraluaratsigu ajoraluartumik iluatsitsinngilarput.