Arctic Green Foodimi sulisut: Qungujulaarutissatsinnik tunisigut

Sulisitsisut Kattuffiata, GA-p, SIK-llu isumaqatigiissinnaannginnerat SIK-mi ilaasortat qatsuppaat utaqqikatallutillu. Nalliuttorsuit aallartilerput, isumaqatigiinniarnerillu apriilimili unipput, SIK-milu ilaasortat isumaqatigiittoqarnissaa piumasaraat. Nuummi umiarsualivimmi sulisut, Arctic Green Foodimilu sulisut, SIK-milu ilaasortaasut, isumasiorpavut, siulittaasullu, Jess G. Berthelsenip, sulinera nalilersillutigu, siullermilli isumaqatigiinniarnerit unittooqqanerat utaqqikatallugu SIK-mi ilaasortat isummernerat tusariartigu:

- Maani Arctic Green Foodimi sulisuusugut utaqqikataavippugut. Akissarsiagut appasinnermik. Assut ajuusaarnarpoq. Ulaperuluuginnaq sulilluni taamaannera aappaatigut nuanninngilaq. Anguniagartik angusariaqaraluarpaat. Taamaaginnarniarunik naamik nuanninngilaq. Akissarsiat tungaatigut qaffaasoqarnissaa erinitsaatiivipparput. Isumaqatigiinniarnerit iluamik tunngavilimmik ingerlanissaat neriuutiginaraluarpoq. Jess G. Berthelsenip ikiuinissaa qinnuigerusukkaluarpara. Nalliuttorsuit aallartereerput, qungujulaarutissatsinnillu tunineqarata, Arctic Green Foodimi sulisut assigiinngitsut arlallit oqarput.

Nuummi Arctic Green Food-imi sulisoq aamma Royal Arctic Line-imi sulisut SIK-imi ilaasortat tusarpasi, SIK-ip GA-llu isumaqatigiissuteqarnissaannik utaqqikatattut.

Sulisitsisut Kattuffiata GA-p, Sulinermillu Inuussutissarsiuteqartut Kattuffiata, SIK-mi ilaasortat akissarsiaat pillugit isumaqatigiiniarnerigaluat apriilimili unittoorpoq. Sulisartut aatsaannguaq oqaloqatigisavut aperigaluarpagut isumaqatigiinniarnermi isumaqatigiinngissutaasoq pillugu isumaat tusarusullutigu, taakkuali tusagassiuutitigut tusartakkatik kisiisa nalunnginnamikkik isumaqatigiinngissutaasoq oqaaseqarfigisinnaanagu oqarput.

SIK piumasaqarpoq Sulisitsisut Kattuffiat GA SIK-imi qaammarsaanermut ilinniartitaanermut aningaasaateqarfimmut aningaasaliisarnissa, tamannali GA-mi isumaqatigineqanngilaq, GA isumaqarami SIK-p qaammarsaanermut ilinniartitaanermullu aningaasaateqarfimmut aningaasaliissutigineqartartut, SIK-p ulluinnarni allaffimmi ingerlatsinerminut atortarai, sisamanngormat kingullermik SIK GA-lu isumaqatigiinniarlutitk aallarteqqikkaluarput, minutsillu quliinnaat ataatsimeereerlutik isumaqatigiiniarnertik unitsippaat.

SIK-p GA-llu isumaqatiginniarnerisa aallarteqqinneqarnissaat suli ullulerneqanngilaq.