Arctic Green Foodimi sulisut 60-it saniatigut tunisisartut aamma eqqugaassapput

Arctic Green Foodimi ukioq naallugu sulisartut 60-it missaannik amerlassuseqarput. Aasaaneranilu ulapaarfinni taakkua 100-nik ilasarput. Aalisartullu tunitsivinnut tunisisartut 300-it missaanniimmata Arctic Green Food ilumut matuinneqassanersoq naalakkersuisut aaliangiiffigissappassuk eqqugaasut amerlangaatsiassapput. Sulisummi soraarsinneqarnerat ilisimatittissutaareerpoq.

Arctic Green Foodikkut naalakkersuisullu aningaasaliissutissat pillugit isumaqatiginninniarnerat suli naammassinngitsut sooq soraarsitsisoqareernersoq apeqqutigigatsigu Kaka, Tønnes Berthelsen ima akivoq:

- Sulinermut inatsisit malinniarlugit amigartoorutillu minnerpaajunissaat qulakkeerniarlugu soraarsitsinerit piortorput, AGF-ip pisortaa Tønnes Berthelsen oqarpoq. Erseqqissaatigaalu naalakkersuisut aningaasaliissappata soraarsitsinerit atorunnaarsinneqarumaartut.

Kilittissiatut inissiinianngikkaluaraanniluunniit nunaqarfinni tunitsiviit ingerlaannarnissaannut naalakkersuisut akisussaaffimmik tigumminnittuupput, inuiaqatigiit sinnerlugit nunaqarfinni tunitsiviit qulinngiluat siunissaat pillugu aaliangiisuusussaagamik.

Naalakkersuisunullu isumaqatiginninniarneq suli ingerlasoq Arctic Green Foodip pisortaa oqarpoq.