Arctic Green Food: USA tuniniaavigissallugu iluaqutissartaqanngilaq
Neqinik tuniniaasinnaanermik upernaaq USA-mut ammaassineq nunatsinni tunisassiortumit Arctic Green Food-imit iluatigineqanngilaq. Tønnes Berthelsen Arctic Green Food-ip pisortaa oqaloqatigaarput:
- Tunisassiagut maannakkut ima annertutiginngillat USA imaluunniit Canada-p kujasinnerusortaa toqqammavigissallugit. Nunatsinni piumaneqassusaat nunanilu avannarlerni piumaneqassusaat naammasseqqataannartaratsigit. Taamaammat maannakkoqqissaaq pilersaaruteqanngikkallarpugut aamma paasigatsigu suliaq taakanngaanniit ingerlanneqartoq, Tønnes Berthelsen, Arctic Green Food-imi pisortaq oqarpoq nangillunilu:
- Taakaniikkatta paasisatta ilagivaat tasamani umimmaleriffeqartoq tuttuleriffeqartorlu Nunavup ilaani, taavalu aamma umimmaap tuttullu neqaanik kujasinnerusumut tuniniaasartut, Arctic Green Food-ip pisortaa Tønnes Berthelsen oqarpoq.
