Arctic Green Food sulisunik soraarsitsiortorpoq

Arctic Green Foodip nunaqarfinni matooraaniarnera pillugu politikerit iliuuseqarnissamik tutsaqannginnerat pissutigalugu soraarsitsisoqarlunilu matusisoqartussanngortoq, Arctic Green Foodip pisortaa, Johanne Heilmann Petersen oqarpoq.

Aalisarnermut Piniarnermullu Naalakkersuisoq Ane Hansen politikerit qanoq iliuuseqannginnerannik oqarneq ilumuunnginnerarpaa.

Arctic Green Food nalunaarfigineqareerpoq aningaasanut inatsisissaq naammassineqareerpat, tamannalu aqagu inatsisartuni oqaluuserineqassaaq, kiffartuussinissamut isumaqatigiissutit pillugit isumaqatiginniartoqarumaartoq, tamannalu decemberip ulluisa 14-anit aallartinneqartussaasoq, Ane Hansen erseqqissaavoq.

Suliffeqarfiup Arctic Green Foodip pissusilersornera Ane Hansenimit nuannarineqanngilaq.

-Arctic Green Foodi sulisuni pilliutigalugit piaartumik kiffartuussinissamik isumaqatigiissusiorniarsarivoq, Ane Hansen oqarpoq. Aningaasanut inatsisissaq naammassineqaqqaassaaq. Kiffartuussinissamullu isumaqatigiissuteqarnissamut piumasaqaatit erseqqissut qulakkeerneqassapput, Ane Hansen oqarpoq.

Aalisartut, piniartut suliffeqarfimmilu sulisut tapersersorpagut. Taamaattumik kiffartuussinissamut isumaqatigiissutip nutarterneqannginnerani qulakkeerlugu paaseqqaarusupparput, suliffeqarfiup Arctic Green Foodip kiffartuussinermut isumaqatigiissuteqarnermi aningaasat qanoq sumullu atorsimaneraat, Ane Hansen nassuiaavoq.

Suliffeqarfiup Arctic Green Foodip kiffartuussinissamut isumaqatigiissut aallavigalugu naalakkersuisoqarfimmut nalunaaruteqartartussaanini maleruanngimmagu Ane Hansenip qatsulluinnarpaa.

Arctic Green Foodip suliffeqafia Attumiittoq nalunaaruteqaqqaanerani matuneqarnera pillugu paasiniaasariaqarsimavugut. Paasiniaanitsinnilu paasivarput, Arctic Green Food-ip nunaqarfinni qulingiluani suliffeqarfini matugai, Ane Hansen oqarpoq.

Arctic Green Foodip pisortaa, Johanne Heilmann Petersen aamma siulersuisuni siulittaasoq, Charles Kasterberg matusinerit soraarsitsinerillu pillugit oqaaseqartinniarsimagaluarpagut tamannali ulllumikkut iluatsissinnaasimanngilarput.