Arctic Green Food: Qeqertarsuatsiaat sikuliorfittaarumaarpoq

Qeqertarsuatsiaani Arctic Green Food-ip aalisakkerivianni sulisut atukkatik naammagiunnaaraat ippassaq tusarliupparput.

Sulisut sinnerlugit oqaaseqartup noqqaassutigaa ajornartorsiutit aaqqiiviginiarneqartariaqartut.

Arctic Green Food-imilu pisortaq, Tønnes Berthelsen nassuerpoq oqarluni ajornartorsiut, aalisakkeriviup sikuliorfeqannginnera, aaqqiiviginiarneqartoq:

- Siornali nalunngilarput Qeqertarsuatsiaani sikuliorfik pisoqaavallaartoq. Nutaamik inniminniinuuvugut, taannalu Qeqertarsuatsiaanut tikittussaavoq.

Sulisut suliffimminni pissutsinik naammaginngisaqarunik, naammagittaalliornermi aqqutissat nalinginnaasut atorneqartarnissaat, Tønnes Berthelsenip aamma kaammattuutigaa.

Qeqertarsuatsiaani sulisut sinnerlugit oqaaseqartup, Ingvar Motzfeldtip, allagaqaateqarnermini ilaatigut oqaatigaa atortut atoqqusaanngitsut atortarsimagitik, sullivinnillu nakkutilliisut tikilermata atortut toqqorterneqartarsimasut.

- Tamannali paatsuuineruvoq, Arctic Green Food-ip pisortaa oqarpoq:

- Sullivinnik Nakkutilliisoqarfik suleqatigilluarparput, aamma taakku toqqortuiffiginavianngilagut, Namminersornerullutik Oqartussat suliffeqarfiutigivaatigut taamatullu ileqqulersornavianngilagut, Tønnes Berthelsen oqarpoq.

Inuussutissalerinermik nakkutilliisut pulaarnerat paarlattoorutigineqarsimasinnaasoq Tønnes Berthelsenimit aamma oqaatigineqarpoq.