Arctic Green Food qaammatini pingasuni akuerineqarallarpoq, piumasaqaatitalimmik
Isumaqatigiissut qaammatini pingasunut atuuttussatut akuerineqarpoq.
Tamatuma kinguneraa Kangerlussuarmi umimmannik tunitsiviup ingerlanneqarsinnaaneranik aammalu nipisat suaanik tunisineq marsip apriilillu qaammataani ingerlanneqarsinnaanerannik.
Arctic Green Food Namminersornerullutik oqartussanik kiffartuussinissamut ukiup 2009-ip sinneranut isumaqatigiissuteqarsinnaanissamut naalakkersuisut suleqatigiissitaliamik pilersitsipput, taakkualu qaammatini pingasuni tulliuttuni qulaajaassapput. Ukiup sinneranut kiffartuussinissamut isumaqatigiissummik akuersisoqassappat Arctic Green Food-ip aningaasaqarnikkut inissisimaneranik nassuiaateqarnissaanik piumasaqaateqarpoq.
AGF-imik kiffartuussinissamik isumaqatigiissutaagallartoq, 3.860.225 kr.-inik naleqarpoq, tassalu kiffartuussinissamut isumaqatigiissutip ukioq 2009-imut atuuttup 8 millionit koruunit iluanni 3,8 millionit koruunit aningaasartuutigineqassapput, aningaasaqarnermut ataatsimiititaliaq allappoq. Arctic Green Food tullianik kiffartuussinissamik isumaqatigiissuteqarfigineqassappat. Aningaasaqarnermut ataatsimiititaliaq arlalinnik piumasaqaateqarpoq, apeqqutinillu itisilerneqartariaqartunik paasisaqarusulluni.
Kiffartuussinissamik isumaqatigiissutip pitsaassusiata inatsisilerinikkut qulakkeerneqarsimanera killeqartoq aningaasaqarnermut ataatsimiititaliamit paasineqarpoq, ataatsimiititaliaq akuersinerminni ilaatigut taamatut allagaqarput, nangillutillu , isumaqatigiissut pisortat illua tungitut peqataaffigisaat taama iluseqartilluni naammaginartumik pitsaassuseqartitsinissamik piumasaqaammut eqquutsitsinnginnera assorsuaq naapertuutinngitsutut aningaasaqarnermut ataatsimiititaliamit isigineqarpoq, kiffartuussinissamullu isumaqatigiissut tulliuttoq nassiunneqannginnermini pitsaassusissaa qulakkeerniarlugu inatsisilerituumut piginnaaneqartumut isumaqatigiissusiortarnermillu ilisimasaqartumut nassiunneqassasoq aningaasaqarnermut ataatsimiititaliap inassutigaa. Tamatuma saniatigut inatsisartut aningaasaqarnermut ataatsimiititaliaata akuersigallarnermini allakkamini isumaqarpoq, Arctic Green Food aningaasaqarneq eqqarsaatigalugu naapertuuttumik ataatsimiititaliamit ingerlanneqarsorineqanngilaq. Arctic Green Food-ip allaffissornermut akissarsianullu aningaasartuutitut nalunaarsugai annertoorujussuupput taamaattumillu Arctic Green Food-imi aningaasartuutit taamak qaffasitsigisut ingerlatiinnarnissaat siunertaralugu pisortat kiffartuussinissamik isumaqatigiissutinut akiliutaat tunniunneqarneq ajormat ingerlatseqatigiiffimmut erseqqissaatigineqartariaqarpoq inatsisartut aningaasaqarnermut ataatsimiititaliaat allappoq. Saarulliit akiisa appariartornerat ingerlatseqatigiiffiup Arctic Green Food-ip aningaasaqarnerata ingerlanerliorneranut nassuiaatigissallugu naammanngitsoq inatsisartut aningaasaqarnermut ataatsimiititaliaa kiffartuussinissamut akuersigallarnerminik ilaatigut taamatut allappoq.
Arctic Green Foodip pisortaa Tønnes Berthelsen oqaaseqartinniarsimagaluarparput iluatsinnatiguli.
