Arctic Green Food: Naalakkersuisup neriorsuutini eqquutsinngilaa

Arctic Green Food naalakkersuisunit ilisimatinneqartuarpoq aningaasanut inatsit naammassitinnagu kiffartuussinissamik isumaqatigiissusiorfigineqarsinnaanngitsoq, aalisarnermut piniarnermut nunalerinermullu naalakkersuisoq Ane Hansen radioaviisimut ippassaq oqarpoq.

Taamatullu oqarnera isumaqatigineqarani Arctic Green Foodimit maanna qisuariarfigineqarpoq. Arctic Green Foodimi siulersuisut pingasunngormat ataatsimiipput. Kiffartuussinissamik isumaqatigiissusiortoqarsimannginnera tunngavigalugu siulersuisut ima aalajangertut Arctic Green Foodimi pisortaagallartoq Johanne H. Petersen nassuiaavoq.

-Sulisut suliunnaarnissaannik nalunaarfigineqartariaqartut, pissutigalugu Aalisarnermut, Piniarnermut Nunalerinermullu Naalakkersuisoqarfimmit aasaq nalunaarfigineqaratta, novemberip 30-anni 2009-mi kingusinnerpaamik kiffartuussinissamik isumaqatigiissutissaq naammassineqareersimassasoq, Pisortaagallartoq Johanne H. Petersen oqarpoq.

Naalakkersuisunit ilisimatinneqartareeraluarpusi aningaasaqarnermut inatsisissaq piareertinnagu kiffartuussinissamik isumaqatigiissusiortoqarsinnaanngitsoq, tamanna utaqqilaaqqaarsimasinnaanngilisiuk?

- Utaqqeqqaarsimasinnaanngilagut pissutigalugu sapaatip akunnera 51, tassa juullip ukiortaallu akornanni ullut ikitsuaraapput, taakkunani ulluni siumut soraarsitsisimanngikkaluarutta akissaqartinneqarsimassanngikkaluarput sulisut kiisalu tunisisussat, akissaqartinnagillu tunioraatissinnaannginnatsigit, Johanne H. Petersen oqarpoq.

Arctic Green Foodimi sulisut 145-it soraarsinneqarnissamik nalunaarfigineqarput.

Arctic Green Foodip tunitsiviinik matusinikkut nunaqarfimmiut pilliutigivisigit?

- Taamatut isumaqanngilanga, nunaqarfiit pilliutiginiaannarlugit taamatut saqqummiussinnginnerput paasineqaqqunaraluaqaaq. 2010-mulliuna kiffartuussinissamik isumaqatigiissutissat pinngitsoorsinnaannginnatsigit aningaasanut inatsisissaq naammassitinnangu taamatut siulersuisut qisuariartut, Johanne H. Petersen oqarpoq.

Arctic Green Foodimi sulisut 145-it soraarsinneqarnissamik nalunaarfigineqarput.