Kalaallit Tunisassiorfiat Arctic Green Food A/S matuvoq, suliallu ingerlatai akilersinnaannginnerusutut ilisimaneqartut, Greenland Venturemit juunip aallaqqaataani tiguneqarput.
KNI-mi Arctic Green Food A/S-illu siulersuisuini siulittaasoq Simon Olsen Nuka A/S-iusimasup matunera pillugu ima nassuiaavoq:
-Tassa Arctic Green Food maannakkut tamarmi KNI-minngaanniit – erseqqissumik oqaatigalugu anisimalerpoq.
-Tunisassiorfiit kingulliit “akilersinnaannginnerusumik” taaneqartartut juunip aallaqqaataani Greenland Venture-imit pisiarineqarput, taamaalilluni KNI-p AGF-imi ingerlatsinini qaangerpaa, Simon Olsen oqarpoq.
Taamaalilluni KNI suliaminut tunngasunut periarfissarissaarnerulissasoq oqaatigaa.
- Taamaakkaluartut pisisut pisariaqartitsinerat malillugu allaffeqarfikkut KNI-mit ikiorneqassapput, taakku aalajangerumaarpaat qanoq sivisutigisumik ikiorneqassallutik, sioqqutsilluk nalunaartartussaapput, nassuiaavoq.
Pingaartinneqarpoq aalisakkanik pisiortorneq Greenland Venture-imit ingerlaatiinnarsinnaaqqullugu suleqataanissaq.
Greenland Venture-lu tamanna isumagereerneqarnikuuvoq.
Simon Olsen ilanngullugu oqarpoq siulersuisut Upernavimmi sapaatip-akunnerata tulliani juunip ulluisa 13-anniit ataatsimiissasut.
Tunisassiorfiit juunip aallaqqaataani Greenland Venture-imit ingerlanneqalersut pillugit oqaaseqartitsiniaraluaratta, Arctic Green Food-ip maannamut pisortaata Tønnes Berthelsenip ilisimatippaatigut, tusagassiorfinnut ullup ilaagut nalunaarutigineqarumaarlutik.
Kim Høegh Dam aamma Hannes Hansen tassaapput piginneqatigiit Arctic Prime Fisheries-imik imminnut taasut. Taakku suliffeqarfiit Qaqortumi, Nanortalimmi Kuummiunilu apriilip aallaqqaataani pisiaraat. Royal Greenlandip ulloq taanna tunisassiorfiit qulit ukunaniittut aamma pisiaraat; Kangaatsiaq, Niaqornaarsuk, Ikerarsaarsuk, Kangaamiut, Sarfannguaq, Itilleq, Atammik, Nuuk, Qeqertarsuatsiaat aamma Arsuk.