Arctic Green Food akiliisinnaajunnaarpoq

Arctic Green Foodip aningaasatigut ajornartorsiornera ima annertutigaaq akilisinnaajunnaartutut ullumikkut nalunaarutigineqarluni.

- Unitsitsilluinnartoq tassaasimasoq akileraarnermut pisortaqarfiup suliffeqarfiup kontoi mattussimammagit aammalu akiliisitsiniaaneq ingerlattualersimallugu. Taamaammat suliffeqarfik sapaatip akunnera kingullerli uninngalerpoq, Arctic Green Foodimi qullersaagaluartut piginneqataasullu nalunaarput.

Arctic Green Foodip aningaasatigut ajornartorsiornera saqqummerpoq februaari aallartilaartoq aalisartut arlallit oqaluttuarmata siorna nipisat suaannik tunisinermit bonusisiassatik Arctic Green Foodimit akilerumaneqanngitsut.

Aningaasarsiornikkut ajornartorsiorneq ajornartorsiutillu allat pissutaallutik Arctic Green Food uniinnarpoq.

- 2012ip ingerlanerani tunisassiatta pingaarnerit akii apparujussuarput nunaqarfinnilu tunisassiat sukateriffigineqarlutik. 2013-mi januarimi AGF teknikkikkut ajutoorujussuarpoq qerititsivissuaq ajortilluni taamalu tunisassiorneq sivisuumik uninngalluni. Tamatuma kinguneranik akiligassanik nassiussuineq inniminneriikkanillu pissarsiniarneq ajornakusuulerpoq suliffeqarfiup aningaasanik tigoriaannaateqarniarneranut ajoqusiisumik. Aamma piffissami tassani aningaaseriviup suleqatigisatta suleqataanini annikillisarpaa, Arctic Green Foodimi siornatigut qullersaasut piginneqataasullu nalunaarput.

Maanna tunisassiorfiit illutaannik attartortitsisoq Greenland Properties A/S kommunit suleqatigalugit misissuivoq tunisineq qanoq ililluni ingerlaqqissinnaanersoq.