Arctic Frontiersimi Aleqa Hammond peqataalerpoq

Arctic Frontiers tassaavoq issittoq pillugu oqallittarfik inuussutissarsiornermik soqutigisaqartunit, ilisimatuunit, tusagassiortunit aamma politikerinit peqataaffigineqartartoq.

Aappaagu oqallinnermi sammineqassaaq,  Issittoq suliffissuaqarfissatut ukiuni kingullerni soqutigineqarnerulernerata kinguneranik aamma silap allanngorisartornerata kinguneranik inuiaqatigiit peqqissusaannut tamanna qanoq siunniuteqassanersoq.

Ataatsimeersuarnissaq immikkoortunut marlunnut avinneqarluni ingerlanneqassaaq. Ulluni siullerni marlunni ataatsimeersuarneq politikkimut sammisinneqassaaq ullullu tulliuttut pingasut Issittoq pillugu ilisimatusarnerit inerneri suunersut aallaavigalugit oqallittoqassalluni.

Aamma Issittumi Siunnersuisoqatigiit siuariartornissaa anguniarlugu, Arctic Frontiersip Norgemik suleqatiginninniarnera ataatsimeersuarnermi aallarnerneqassaaq. Suleqatigiinnianerneq tamanna Arctic Frontiers Plus-imik taaguusinneqareerpoq. Tassani oqallisaasussaq tassaassaaq nunat amerligaluttuinnartut Issittumi Siunnersuisoqatigiinnut peqataarusulernerisa siunissami kingunerisinnaasaat.

Tromsø-mi ataatsimeersuarnermi peqataasussat 1.000-it missaanniissasut, ataatsimeersuarnermik aaqqissuisut pisortaata, Ole Øvretveit-ip oqaatigaa.