Arctic Circle Racemi ajugaasut ilisarnartortaqaqaat

Arctic Circle Race Sisimiuni ippassaq naammassimmat, ajugaasut tummarfiini kiinnat ilisarnartut arlaqarput.

Arnani ajugaavoq Uiloq Slettemark – Arctic Circle Race-mi katillugit arfineq-pingajussaa ajugaalluni.

Miillaaraq Lennerth – 18-iinnarnik ukiulik, Sisimiormiu, Norgemili najugaqartoq – normu 2-nngorpoq. Miillaaraq ingerlaarfiit pingajuanni kingullermilu Uiloq Slettemarkimit minutsinik 20-nik siulliugaluarpoq – tamannali inernerit katinneranni naammanngilaq. Arnani normu 3-ngorpoq Hanne Kristiansen Aasianneersoq.

Angutini sukkanerpaavoq Øystein Slettemark. Øystein Slettemark Arctic Circle Race-mi sisamassaa ajugaavoq – nittartakkamilu ACR naggat GL-imi atuarneqarsinnaavoq, Arctic Circle Race-mi peqataasalillaramili aatsaat taama ilungersornartigisukkoorsimalluni. Ingerlaarfimmi kingullermi Øystein Slettemarkip apuuteqatigaa Schweizimeersoq, Simon Drayer – taannalu tassa inernerit katinneranni normu 2-ngorpoq.

Arnat sisoraatinik arpallutik 100 kilometererneranni ajugaavoq 14-iinnarnik ukiulik, Amalie Lynge – unammillertini ingerlaarfinni pingasuusuni siullermili inissippai, aamma ingerlaarfimmi kingullermi nalunaaquttap akunneri appaa avillugu siuaqqasimalluni – naggataagullu nalunaaquttap akunnerinik marlunnik.

Angutini 100 kilometerinik sisoraatinik arpannermi ajugaasuuvoq, norgemiu, Morten Nordahl.